ÓSKEMEN. QazAqparat – Óskemen qalasynyń ákimi Jaqsylyq Omar shaharda azyq-túlik qorynyń jetkilikti ekenin aıtty, dep habarlaıdy QazAqparat.
Sońǵy kúnderi qala turǵyndary jappaı azyq-túlik satyp alýda. Dúıim jurt taýarlardyń jetpeı qalady jáne baǵa qymbattap ketedi dep alańdaýly. Osy oraıda qala ákimi halyqty sabyrǵa shaqyrdy.
«Búgin oblys ákiminiń birinshi orynbasary Erlan Aımuqashevtyń tóraǵalyq etýimen bul máselege oraı jıyn ótti. Oǵan qaladaǵy barlyq saýda ortalyqtary men bazar basshylary qatysqan. Jıyn barysynda azyq-túlik qorynyń jetkilikti jáne baǵanyń turaqty ekeni aıtyldy. Sondyqtan turǵyndardy daýryqpaýǵa shaqyramyn», - deıdi Jaqsylyq Muqashuly.
Talǵatjan Muhametbekuly
Óskemendegi S.Amanjolov atyndaǵy ShQÝ-dy "Jýrnalıstıka" mamandyǵy boıynsha támamdaǵan. Eńbek jolyn 2015 jyly ShQO "Aldaspan" gazetinde tilshi bolyp bastady. ShQO "Meniń ólkem" gazetinde tilshi, respýblıkalyq "Jas qazaq", "Zań" gazetterinde Shyǵys Qazaqstan oblysy boıynsha menshikti tilshi, ShQO "Meniń ólkem" gazetiniń bas redaktory qyzmetterin atqarǵan. Kazinform agenttiginde 2021 jyldan beri jumys istep keledi.