Óskemende áıel adamnyń polıtsııada 5 saǵat tergeýden keıin kóz jumǵany jaıly aqparat jalǵan

ÓSKEMEN. QazAqparat – Óskemen qalasynda polıtsııa bólimshesinde áıeldiń tergeýden keıin kóz jumǵany jaıly aqparat shyndyqqa janaspaıdy, dep habarlaıdy QazAqparat tilshisi.

Áleýmettik jelide Óskemende áıel adamnyń 5 saǵat boıy tergeýde bolyp, sodan keıin kóz jumǵany jaıly aqparat taraǵan bolatyn.

ShQO polıtsııa departamenti bunyń shyndyqqa janaspaıtynyn málim etti.

«12 mamyr kúni saǵat 22:30 shamasynda Ertis polıtsııa bólimine habarlasqan qala turǵyny úıinde baǵaly zatynyń joǵalǵanyn aıtqan. Belgili bolǵandaı, sol kúni aryzdanýshynyń úıinde 59 jastaǵy áıel jumys istegen. Tergeý barysynda polıtsııa qyzmetkerleri ony túsinikteme alý úshin bólimshege shaqyrdy. Áıel adam saǵat 23:38-de Óskemen qalalyq PB-ge kelip, jedel-tergeý tobyn kútip turǵan», - delingen aqparatta.

Saǵat 00:26-da áıel kezekshige ózin jaman sezinip turǵanyn aıtty.

Sodan keıin birden jedel járdem shaqyrylǵan.

«Bunyń barlyǵy beınebaqylaý kameralarynyń jazbasy arqyly rastalady. Qazir áıel adam gıpertonııa dıagnozymen medıtsınalyq mekemede jatyr», - delingen habarlamada.