Óskemende áıel adamdy qaǵyp, mert qylǵan avtobýs júrgizýshisi 2,5 jylǵa sottaldy

ÓSKEMEN. QazAqparat – Óskemen qalasynda áıel adamdy qaǵyp, mert qylǵan avtobýs júrgizýshisine qatysty sot úkimi shyqty, dep habarlaıdy QazAqparat tilshisi.

Oqıǵa ótken jyly 25 qarasha kúni bolǵan.

Qala ishinde qatynaıtyn avtobýs tańǵy ýaqytta Karbyshev kóshesinde jaıaý júrginshiler jolaǵynan ótip bara jatqan áıeldi qaǵyp ketken.

Sonyń saldarynan ol oqıǵa ornynda kóz jumǵan edi. Atalǵan is Óskemen qalalyq №2 sotynda qaralyp, sot úkimi endi shyǵyp otyr.

«Júrgizýshiniń kinási is boıynsha jınalǵan aıǵaqtarmen, atap aıtqanda beınebaqylaý kamerasynyń jazbasy, kýágerlerdiń sózi jáne sarapshynyń qorytyndysymen tolyq dáleldendi. Aýyr emes sanatqa jatatyn bul qylmysqa 5 jylǵa deıin bas bostandyǵynan aıyrý jazasy qarastyrylǵan. Sot sheshim shyǵararda aıyptalýshynyń buryn sottalmaǵanyn, kámeletke tolmaǵan balasynyń bolýyn jeńildetetin mán-jaı retinde tanydy», - dep habarlady sottyń baspasóz qyzmeti.

Sot úkimimen er adam eki jarym jylǵa bas bostandyǵynan aıyryldy.

Úkim áli zańdy kúshine engen joq.