Óskemende aýqymdy oıyn bıznesiniń jelisi áshkerelendi

ASTANA. QazAqparat - Shyǵys Qazaqstan oblysynyń memlekettik kirister departamentiniń ekonomıkalyq tergeý qyzmeti oıyn bıznesine qatysty bir ǵana is boıynsha 61 termınalyn anyqtady. Oıyn qurylǵylarynyń barlyǵy joıyldy, dep habarlaıdy «QazAqparat» HAA tilshisi.

Atap aıtqanda, Óskemen qalasynyń 30-ǵa jýyq saýda núktelerinen 61 lototermınal tárkilengen. Olardyń ishinde jalpy somasy 7,4 mln teńgeniń bolǵany anyqtalyp otyr.

«Qylmystyq is kelesi syzba boıynsha iske asyrylǵan: Qaraǵandy qalasynyń turǵyny termınaldarmen jumys atqaratyn kadrlardy jaldap, olarǵa aı saıyn aqshalaryn tólep otyrǵan. Ol jaldaǵan «mamandar» termınal qoıylatyn oryndar úshin saýda núkteleriniń ıelerimen kelisip, qurylǵynyń aqshalaı ınkassatsııasyn júzege asyrǵan. Oıyn bıznesinen túsken soma bank kartasynyń shotyna aýdarylyp otyrǵan», - deıdi ShQO MKD ETQ aǵa tergeýshisi Leıla Ysqaqova.

Qylmystyq top 2016 jyldyń qarashasy men 2017 jyldyń naýryzy aralyǵynda lotoreıalyq utys oıyny retinde qurylǵylardy Óskemen qalasyndaǵy meıramhanalar men saýda ortalyqtaryna, dúkenderine qoıyp, osy aralyqta 21 mln teńge paıda tapqan.

Óskemen qalasynyń sotynyń úkimimen qylmystyq top músheleri 3,5 jyl merzimge shartty túrde sottaldy. Buǵan qosa oıyn bıznesi boıynsha Óskemen men Semeı qalalarynda taǵy eki jaǵdaı tirkelip, oǵan sot úkimi de shyǵyp qoıǵan. Qos qaladaǵy sottalýshylardyń bir jylǵa shartty túrde bas bostandyqtary shektelgen. Sonymen qatar, olarǵa iri kólemde aıyppul salynǵan.

Leıla Ysqaqovanyń aıtýynsha, saýda nemese dúken núktelerin jalǵa berýshiler de nazardan tys qalmaǵan. Mundaı qylmysqa jol bergen adamdar QR Qylmystyq kodeksiniń 307-baby boıynsha jaýapqa tartylady. Kinálary dáleldense olarǵa 2000 AEK-ke deıin aıyppul salynýy múmkin.