Óskemende aýanyń lastanýyn ólsheıtin quraldardyń jaramdylyǵy tekserilmek
23 qarashadan bastap Óskemende qolaısyz meteorologııalyq jaǵdaı qalyptasqan. Sol ýaqyttan beri turǵyndar aýa sapasynyń kúrt nasharlap ketkenine qaıta-qaıta shaǵymdanyp keledi. Eń áýeli Nazarbaev dańǵylynda ornalasqan Dostyq úıi men Gagarın býlvary kóshesiniń mańyndaǵy turǵyn úılerdiń halqy shaǵym túsirdi. Odan soń 25 qarashada burynnan taza aýdan sanalatyn Jibek matalar kombınaty yqshamaýdanyn qara tútin basqan.
Ekologtar aýa sapasyna qatysty ólsheý jumystaryn júrgizdi. Sonyń nátıjeleri boıynsha atmosferalyq aýadaǵy lastaýshy zattardyń shekti ruqsat etilgen kontsentratsııasynan asý deregi anyqtalǵan joq. Alaıda buǵan jergilikti halyq kelispeı, kóshege shyqqanda qatty jótelip, tamaqtary aýyryp, júrekteri aınyǵanyn alǵa tartýda.
«Ózim balabaqshada jumys isteımin. Qazir balalar arasynda tamaǵy aýyryp, jótelip qalǵandar kóbeıdi. Dalaǵa shyǵyp dem alǵanda aýanyń lastanyp turǵany seziledi. Ekologtardyń sheshimin áleýmettik jeliden oqydym. Biraq bul aqylǵa syımaıdy!», — dep Zarına esimdi qala turǵyny narazylyǵyn bildirdi.
ShQO ákimi baspasóz qyzmetiniń málimetine súıensek, bul másele oblys ákimdiginiń baqylaýynda.
«Óskemendegi atmosferalyq aýanyń lastanýyn ólsheýge arnalǵan barlyq quraldyń sertıfıkattalǵanyna tekserý júrgiziledi. Halyq qalanyń ár aýmaǵyndaǵy jaǵdaı týraly habardar etilip otyrady. Sondaı-aq, jeltoqsan aıynda óndiristik kásiporyndarmen eki jaqty jasalǵan memorandýmdardyń oryndalýy men atmosferaǵa zııandy shyǵaryndylardy azaıtý josparlary qaralady», — dedi aımaq basshysy Ermek Kósherbaev.
Eske salsaq, buǵan deıin murjasynan aqaý shyqqan Ekibastuz elektr stansasyna qatysty ekologııa departamentiniń tekserý júrgizip jatqany habarlanǵan.