Óskemende aýadaǵy zııandy zattar shyǵaryndysy ruqsat etilgen shekten asyp ketken

<p>ÓSKEMEN. KAZINFORM &mdash; Óskemen qalasynda aýa sapasyna qatysty tekserý júrgizgen ekologtar zııandy zattar shyǵaryndysy ruqsat etilgen shekten asyp ketkenin anyqtady.&nbsp;</p>

ShQO ekologııa departamenti baspasóz qyzmetiniń habarlaýynsha, 27 qarashada mamandar arnaıy qurylǵylarmen aýa sapasyn tekserdi.

«Ólsheý jumystary qalanyń ártúrli aýdandarynda júrgizildi. Aldyn ala málimetterge sáıkes ólshengen zattar men kúıe shyǵaryndysy boıynsha ruqsat etilgen shekten asyp ketý faktisi tirkeldi. Bul derek «Qazgıdromet» RMK júrgizgen monıtorıng nátıjelerimen de rastaldy», - delingen aqparatta.

Sonymen qatar «Qazgıdromet» RMK mamandary aýadaǵy kómirtegi oksıdi, PM2.5 jáne kúkirt dıoksıdi boıynsha zııandy shyǵaryndylardyń ortasha táýliktik shekten asqanyn anyqtady. 

Eske salsaq, osyǵan deıin Óskemendegi Nazarbaev dańǵylynda ornalasqan Dostyq úıi men Gagarın býlvary kóshesiniń mańyndaǵy turǵyn úılerdiń halqy aýa sapasynyń nasharlap ketkenine shaǵymdanǵan. 

Ekologtar tekserý júrgizgen soń hlorsýteginiń shekti ruqsat etilgen kontsentratsııasynan asyp ketýi tirkelgen. 

25 qarashada óskemendikter taǵy da aýa sapasynyń nasharlaǵanyna shaǵymdandy.

Alaıda sol kúni tekserý nátıjesinde zııandy zattar ruqsat etilgen shekten aspaǵany habarlanǵan.