Óskemende aýa súzý munaralary ornatylmaq

<p>ÓSKEMEN. KAZINFORM &ndash; Óskemen qalasynda ekologııa máselesin sheshý úshin aýa súzý munaralary ornatý kózdelip otyr.</p>

Qalada «Óskemen tynysy» ekologııalyq bıýrosyn qurý jumystary júrgizilip jatyr. Soǵan oraı jumys tobynyń kezekti otyrysy ótti. Bıýroǵa múshe bolatyn adamdar men uıym qurylymy anyqtaldy. Atqarylǵan sharalardyń nátıjesin naqty kórip otyrý úshin jobalyq keńse formatynda jumys isteý týraly sheshim qabyldandy. 

- Bıýronyń negizgi maqsaty – qalanyń ekologııa máselesin sheshý úshin qolǵa alynatyn jumystardy úılestirý. Qazirdiń ózinde 2025 jylǵa arnalǵan jospar daıyndaldy. Onyń ishinde 100-ge jýyq shara bar. Qolaısyz meteorologııalyq jaǵdaı kezderinde áreket etý algorıtmderi ázirlenýde. Sondaı-aq turǵyndardy aýanyń lastaný kórsetkishteri týraly habardar etý júıesi iske qosylmaq, - deıdi joba jetekshisi Elena Berezınskaıa-Abılova. 

Foto: Nellı Nıgmatýllına

Jobalyq keńse memlekettik organdarmen ózara árekettesip, ekologııalyq jaǵdaıdy jaqsartý boıynsha naqty sharalardy usynýda. Olardyń birqatar bastamasy kelesideı:

- zamanaýı datchıkterdi paıdalana otyryp, kólikterdiń zııandy shyǵaryndylaryn baqylaý;

- ekologııa departamentine qajetti jabdyqtardyń tolyq tizimin jasaıtyn kompanııamen yntymaqtastyq ornatý;

- kógaldandyrý alańyn ulǵaıtý;

- Smog Free Tower jabdyǵyn ornatý. Bul 8 metrlik munara. Osyndaı 1 munara bir sátte 30 myń tekshe metr aýany súze alady. Júıe ózi óndiretin 1,4 kVt energııany ǵana tutynady.

Budan bólek, jeke sektordy ortalyqtandyrylǵan jylý júıesine qosý basty nazarǵa alynǵan. Bıýronyń jospary Shyǵys Qazaqstan oblysynyń ákimine 10 qańtarda tanystyrylady.

Eske salsaq, Óskemende aýa sapasynyń buzylyp turǵanyna búgin úshinshi kún.