Óskemende Arheologııa jáne Altaı mádenı murasynyń mýzeıi ashyldy

ÓSKEMEN. QazAqparat - S.Amanjolov atyndaǵy Shyǵys Qazaqstan memlekettik ýnıversıtetinde Arheologııa jáne Altaıdyń mádenı murasy murajaıy men ýnıversıtettiń tarıhı murajaıy ashyldy, dep habarlaıdy QazAqparat altaynews.kz saıtyna silteme jasap.

Tarıh ǵylymdarynyń doktory, arheolog ǵalym Zeınolla Samashev qazaq dalasy, onyń ishinde kendi Altaı óńiri ejelgi metallýrgııa men taý-ken óndirisiniń ortalyǵy bolǵanyn erekshe atap ótti. Kezinde arheolog S. Chernıkov te Shyǵys Qazaqstan aımaǵyn búkil Eýrazııa keńistigindegi qola quıý óneri damyǵan óńirlerdiń biri retinde sıpattaǵan. Ǵalymnyń aıtýynsha, murajaı jádigerleriniń deni Shyǵys Qazaqstan memlekettik ýnıversıtetiniń stýdentteri osy óńirde júrgizgen arheologııalyq qazba jumystary kezinde tabylǵan. 

«Osy jerden tabylǵan qalaıy rýdasy sonaý qos ózen boıynan Mesopotamııaǵa deıin taraǵan. Qola dáýirindegi mádenıettiń jurnaqtary, zattardyń bári Ońtústik Sibirge tarap otyrǵan», - dedi ol.

Elbasynyń «Uly dalanyń jeti qyry» maqalasy aıasynda murajaıdy ashý josparynyń ózektiligi arta túsip, bir jyldan astam ýaqyt daıyndyqtan keıin onyń esigi aıqara ashyldy. Prezıdent óz maqalasynda tarıhymyz ben mádenıetimizge qatysty jeti baǵytty anyqtap, jumys isteýdi tapsyrdy. Sonyń biri - qola dáýirindegi qazaq halqynyń ejelgi metallýrgııasy men óneriniń damýyna baılanysty. Sondaı-aq ań stıli, jylqyny qolǵa úıretý, altyn adamǵa baılanysty barlyq jádigerlerdi jınastyryp, mýzeı ashý tapsyrmasy berildi.

«Áriptesterimniń óziniń týǵan ólkesiniń tarıhyna úlken mán berýi erekshe qýanyshqa bólep otyr. Murajaı ázirge kishkentaı bolǵanymen, óte jınaqy, munda arheologııanyń barlyq kezeńderi qamtylǵan», - dedi Astanadaǵy Ulttyq murajaıdyń dırektory Jáken Taımaǵambetov.

Murajaı qoryn únemi tolyqtyryp otyrý kózdelgen.