Óskemende apta saıyn azyq-túlik baǵasyna monıtorıng júrgizilýde
Qalalyq máslıhat hatshysy Aleksandr Svetashtyń aıtýynsha, Óskemendegi saýda úılerinde, dúkenderde, turaqtandyrý qorynyń pavılondarynda áleýmettik mańyzy bar azyq-túlik baǵasynyń qymbattaýyna jol bermes úshin turaqty túrde monıtorıng júrgizilýde.
«Kásipkerlik bóliminiń mamandary, jergilikti ózin-ózi basqarýdyń aýmaqtyq keńsesi men Nur Otan partııalyq baqylaý komıssııasynyń músheleri aptasyna birneshe ret reıdke shyǵady. Sonyń aıasynda 19 túrli taýardyń baǵasy tekserilip, kásipkerlerge jiti túsindirý jumystary júrgiziledi. Qańtar aıynyń basynan beri osyndaı 10 reıd uıymdastyrylǵan. Sonyń nátıjesinde, azyq-túliktiń 3 túriniń baǵasy óskeni anyqtaldy. Naqty aıtqanda, qant, tuz ben qyryqqabat orta eseppen 1,5 paıyzǵa qymbattaǵan. Al jumyrtqanyń sál arzandaǵany baıqaldy», - dedi Aleksandr Svetash.
Onyń aıtýynsha, zań boıynsha kásipkerler áleýmettik mańyzdy azyq-túliktiń qunyn óndirýshiniń satý baǵasynyń nemese kóterme jetkizýshiniń satyp alý baǵasynyń 15 paıyzynan asyrmaýy tıis.
«Óskemende turaqtandyrý qorynyń ónimderi saýdalanatyn «Ertis» ÁKK» AQ-nyń 20 saýda pavılony bar. Onda sábiz, qyryqqabat, sarymsaq kelisi 82 teńgeden satylady. Áleýmettik mańyzy bar basqa taýarlardyń baǵasy da arzan. Aldaǵy ýaqytta osyndaı pavılondardyń sanyn arttyrý kózdelýde», - dedi qalalyq máslıhat hatshysy.