Óskemende alǵashqy oqýshylar Pfizer vaktsınasyn saldyrdy
ShQO densaýlyq saqtaý basqarmasy baspasóz qyzmetiniń málimetine súıensek, Óskemende jasóspirimder koronavırýs ınfektsııasyna qarsy amerıkalyq Pfizer ekpesiniń alǵashqy dozasyn alýdy bastady.
Ótken aptada oblysqa atalǵan vaktsınanyń 35 100 dozasy jetkizilgen bolatyn.
«Bul vaktsına júkti jáne bala emizetin áıelderge, 12-18 jas aralyǵyndaǵy balalarǵa arnalǵan. Búgingi tańda aımaq boıynsha osy sanattardaǵy 120 000-ǵa jýyq adam bar. Onyń ishinde 85 myńy – balalar», - delingen aqparatta.
Kesheli beri Óskemendegi №1 jáne №2 emhanalarǵa ekpe alýǵa jasóspirimder kelip jatyr.
16 jastaǵy qala turǵyny Dıana Magerramova ekpe saldyrǵannan keıingi óziniń qal-jaǵdaıymen bólisti.
«Bul eń aldymen meniń qaýipsizdigim men densaýlyǵym úshin qajet. Ózimdi jaqsy sezinip turmyn. Burynǵy qalypty ómirge tezirek oralsaq deımin. Sol úshin barsha jerlesterimdi ujymdyq ımmýnıtet qalyptastyrýǵa úles qosýǵa shaqyramyn», - dedi ol.