Óskemende aktrısa teatr dırektoryn sotqa berdi

<p>ÓSKEMEN. KAZINFORM &ndash; Óskemen qalasynda aktrısa ózin jumystan zańsyz shyǵaryp jibergen teatr basshylyǵyn sotqa berdi.</p>

Qalalyq sottyń baspasóz qyzmetiniń málimetine súıensek, ShQO drama jáne operetta teatrynda 30 jyldan astam aktrısa bolyp jumys istegen áıel eńbek shartynyń zańǵa qaıshy buzylǵanyn aıtyp, sotqa aryz túsirgen.

«Talapker jumystan óz erkimen shyqpaǵanyn, teatr basshylyǵynyń ujymdyq shart talaptaryn oryndamaǵanyn jetkizdi. Belgili bolǵandaı, aktrısaǵa repetıtsııa ýaqyty aıtylmaı, spektaklderde oınaıtyn ról múlde berilmeı kelgen», - delingen aqparatta.

Sot jumys berýshi tarapynan buzýshylyqtardy anyqtap, aktrısanyń jumystan shyǵarylýyna onyń basshylyqpen kıkiljıńi sebep boldy degen qorytyndyǵa keldi. Aktrısa qaıta jumysqa ornalastyryldy.

Sot sheshimi áli zańdy kúshine engen joq.

Eske salsaq, osyǵan deıin «Astana Opera» teatrynda opera sahnasy jaryq juldyzynyń mereıtoılyq keshi ótkeni habarlanǵan.