Óskemende aǵash japyraqtarynyń kenet sarǵaıýyna baılanysty tekserý júrgizilýde

NUR-SULTAN. QazAqparat – Óskemende aǵash japyraqtary kúrt sarǵaıyp ketti. Osyǵan oraı tekserý júrgizilip jatyr. Bul jaıynda QR Ekologııa, geologııa jáne tabıǵı resýrstar mınıstrliginiń baspasóz hatshysy Samal Ibraeva málim etti, dep habarlaıdy QazAqparat tilshisi.

«Óskemen ýchaskeleriniń birinde aǵash japyraqtarynyń kúrt sarǵaıyp ketkendigi týraly habarlamaǵa baılanysty mundaı qubylystyń sebebin tekserý jáne zertteý júrgizilip jatyr. Atap aıtqanda, «Qazmyrysh» JShS-na tekserý júrgiziledi. Erteń ekologtarymyz kombınatta tehnıkalyq reglamentterdi esepke alý jýrnaldarynyń bárin tekserip, ınjenerler men tehnologtardan jaýap alady. Aıta keterligi, «Qazgıdromet» RMK monıtorıng stansasy 27 mamyr men 2 maýsym aralyǵynda ónerkásiptik shyǵaryndylardyń qandaı da bir normadan asqandyǵyn tirkegen joq. Qalaı desek te, tekserý solaı ekendigin kórsetýi tıis. Sondyqtan ázirshe qorytyndy shyǵarýǵa erte», - dep jazdy Samal Ibraeva Facebook paraqshasynda.

Onyń atap ótýinshe, Tótenshe jaǵdaılar basqarmasynda da, Ónerkásiptik qaýipsizdik departamentinde de jappaı shyǵaryndylardyń oryn alǵandyǵy týraly málimet joq. Osyǵan oraı mınıstrlik ókili qandaı da bir aqparat biletin qala turǵyndarynan Shyǵys Qazaqstan oblystyq ekologııa departamentine júginýdi ótinedi.

«Qupııa qalatynyna kepil beremiz. Memlekettik organdarǵa ǵana úmit artpaı, kásiporyn qyzmetkerleriniń de shynaıy aqparat usynýǵa járdem kórsetýi mańyzdy. Sondyqtan da qalanyń ónerkásiptik kásipornynyń tehnıkalyq qyzmetkerlerinen shyǵaryndylar týraly shynaıy aqparat usynýǵa shaqyramyz», - dedi ol.