Óskemende 50 myńǵa jýyq bótelke alkogol ónimi zańsyz saqtalǵan

Óskemen. QazAqparat - Óskemen qalasynyń kóterme qoımalarynyń birinen 49 myń bótelkeden astam mólsherde óndirýshileri men ataýlary ártúrli alkogol ónimderin zańsyz saqtaý deregi anyqtaldy, dep habarlaıdy QazAqparat.

Qarjy mınıstrligi taratqan málimetke qaraǵanda, alkagol ónimderiniń ishinde «Qulan», «Pshenıchnaıa», «Haoma», konıaktar: «Qazaqstan», «Sikvaruli» «Grýzınskıı» araqtary, «Alazanskaıa dolına», «Mýskat», «Sovetskoe Shampanskoe» sharaptary bar. «Etıl spırti men alkogol óniminiń óndirilýin jáne aınalymyn memlekettik retteý týraly» Zańǵa sáıkes etıl spırti men alkogol ónimin odan ári kóterme jáne bólshek saýdada ótkizý maqsatynda saqtaý lıtsenzııa negizinde júzege asyrylýy tıis. Alynǵan alkogol synamalary saraptamaǵa jiberildi. Tekserý materıaldary ShQO Ekonomıkalyq tergeý departamentine protsessýaldyq sheshim qabyldaý úshin tapsyryldy», - delingen vedomstvonyń habarlamasynda.

Aıta keteıik, bul – qysqa ýaqyt ishinde Óskemen qalasynan tabylǵan alkogol ónimderiniń zańsyz aınalymynyń ekinshi deregi. Sáýir aıyndaǵy tekserý kezinde de alkogol ónimderin zańsyz túrde daıyndaý faktisi anyqtalǵan.

Alkogol ónimderi naryǵy sýbektilerin tekserý is-sharalary jalǵasýda.