Óskemende 4 kópqabatty úı zańsyz salynyp jatyr

ÓSKEMEN. QazAqparat – Óskemen qalasynda zańsyz salynyp jatqan 4 kópqabatty úı anyqtaldy, dep habarlaıdy QazAqparat tilshisi.

Búginde Shyǵys Qazaqstanda kommertsııalyq turǵyn úılerdiń qurylysy qarqyndy júrgizilýde. Alaıda tabys tabý maqsatynda josyqsyz qurylys salýshylar da paıda bolǵan. Olar eshqandaı ruqsat qujattaryn almastan, úleskerlerdiń qarajatyn tartyp kópqabatty úıler salyp jatyr.

ShQO memlekettik sáýlet-qurylys baqylaý basqarmasynyń málimetinshe, Óskemende kópqabatty 4 úıdiń qurylysy zańsyz júrgizilýde. Olardyń biri – Krasın kóshesi, 11V mekenjaıynda ornalasqan «Grand Residence» turǵyn úı kesheni. Tapsyrys berýshi – «MRS Company» JShS.

«Búginde kompanııa ákimshilik jaýapkershilikke tartylyp, qurylysqa tyıym salyndy. Eger qurylysty toqtatpasa, sot sheshimi májbúrli túrde oryndalady. Ekinshi úı – Kókjal Baraq kóshesi, 19/2 mekenjaıynda ornalasqan «Oazıs-4» túrǵyn úı kesheni. Tapsyrys berýshi «Selam KZ» JShS zań sheńberinde jaýapqa tartyldy. Úshinshi úı – 19-shy shaǵyn aýdannyń «Araı» turǵyn aımaǵyndaǵy №59 qurylys ýchaskesinde salynyp jatyr. Tapsyrys berýshi «Deıneka» kompanııasy qurylys júrgizý lıtsenzııasynan aıyryldy. Al tórtinshi úı – «Renesans» turǵyn úı kesheniniń qurylysyna tapsyrys bergen «Elit Stroy Group» JShS de ákimshilik jaýapkershilikke tartylyp otyr. Barlyq úıler boıynsha qurylysty toqtatýǵa qatysty sot sheshimi shyqty», - delingen aqparatta.

Eske salsaq, osyǵan deıin ShQO turǵyndarynan úlesker retinde qarajat tartýǵa quqyǵy joq kompanııalardyń tizimin jarııalaǵan bolatynbyz.