Óskemende 30 mln teńge salyq tólemeı qashyp júrgen kásipker ustaldy

ÓSKEMEN. QazAqparat – Óskemen qalasynda polıtsııa qyzmetkerleri 30 mln teńge salyq tólemeı qashyp júrgen kásipkerdi ustady, dep habarlaıdy QazAqparat tilshisi.

Qalalyq polıtsııa basqarmasy baspasóz qyzmetiniń málimetine súıensek, tártip saqshylary «Quqyqtyq tártip» jedel aldyn alý sharasy barysynda qomaqty qaryzy bar 32 jastaǵy kásipkerdi tapty.

«Belgili bolǵandaı, kásipkerlikpen aınalysqan er adam ýaqytyly salyq tólemegendikten boryshy 29 799 087 teńgege jetken. Ol basqaryp kelgen JShS sot sheshimimen bankrot bolyp tanylyp, sýbsıdıarlyq jaýapkershilikke tartylǵan. Alaıda sot oryndaýshysy boryshkerdi taba almady. Sóıtip, kásipkerge izdeý jarııalaǵan», - dedi basqarma bastyǵy Andreı Mýla.

Polıtseıler men kóshi-qon qyzmetiniń mamandary birlesip, boryshkerdiń mekenjaıyn anyqtady.

Kóp uzamaı er adam ustalǵan.

Qazirgi ýaqytta ispen sot oryndaýshysy aınalysyp jatyr.