Óskemende 30-ǵa jýyq mektepke bomba qoıylǵany týraly habar jalǵan bolyp shyqty
ShQO Polıtsııa departamenti baspasóz qyzmetiniń málimetine súıensek, 10 aqpan kúni túski ýaqytta polıtsııaǵa Óskemendegi jıyrma alty mektepke jarylǵysh zat qoıylǵany týraly habar túsken.
«Sıgnaldy alǵannan keıin mamandandyrylǵan qyzmetter dereý mektepterge keldi. Qyzmetkerler men oqýshylardy evakýatsııalaý júrgizildi. Obektilerdi qarap, tekserý nátıjeleri boıynsha qandaı da bir qaýipti zattar tabylǵan joq», - delingen aqparatta.
Atalǵan fakti boıynsha QR QK-niń 273-babymen sotqa deıingi tergeý amaldary bastaldy. Qazirgi ýaqytta bomba týraly jalǵan habar bergen adamdardy anyqtaý boıynsha is-sharalar júrgizilýde.
Bul osy apta ishinde mektepke bomba qoıylǵany týraly habar túsken úshinshi jaǵdaı. Eń birinshi 6 aqpanda Óskemende sotqa jáne mektepke bomba qoıylǵany týraly habarlanǵan. Alaıda tekserý barysynda eshqandaı jarylǵysh zat tabylmady.
Sondaı-aq, keshe Óskemende taǵy da mektepke bomba qoıylǵany týraly habar túsip, oqýshylar men muǵalimder evakýatsııalanǵan.
Tekserý nátıjesinde bomba joq bolyp shyqty.