Óskemende 23 qurylys kompanııasy turǵyndardy úlesker bolýǵa kóndirip, aqshasyn alǵan

ÓSKEMEN. QazAqparat – Óskemen qalasynda 23 qurylys kompanııasy turǵyndardy úleskerlikke zańsyz tartqan. Bul týraly búgin oblys ákimdiginde ótken jınalysta aıtyldy, dep habarlaıdy QazAqparat tilshisi.

ShQO qurylys basqarmasynyń basshysy Inna Valldyń aıtýynsha, qazirgi ýaqytta Óskemen qalasynda 48 turǵyn úı salynyp jatyr. Buǵan 37 kompanııa tartylǵan.

«Onyń ishinde 28 úı qurylysyn júrgizip jatqan 23 kompanııa turǵyndardy úleskerlikke zańsyz tartqany anyqtaldy. Olar klıentterge eshqandaı kepildik bermegen, qajetti ruqsaty men tehnıkalyq qujattamasy bolmaǵan, úleskerlerden jarnany merziminen buryn eseptegen. Al bir JShS 5 qabatty turǵyn úı salýǵa ruqsat qujatyn alǵanymen, áleýmettik jeli arqyly sol jerge toǵyz qabatty úı salynatyny týraly jarnama taratqan», - dedi ol.

Jınalysqa qatysqan kompanııa basshylary memlekettik organdardyń talaptaryna sáıkes, qysqa ýaqyt ishinde búkil zańsyzdyqtardy joıatynyn jetkizdi.

«Osyndaı zańsyzdyqtardyń saldarynan erteń talaı adamnyń aldanyp, aqshasynan aıyrylyp qalýyna jol bermeý kerek. Merdigerler zańsyz qurylysty dereý toqtatyp, barlyq jumysty tek zań sheńberýinde júrgizýi tıis», - dedi aımaq basshysy Danıal Ahmetov.

Foto: gov.kz