Óskemende 170 myńnan astam adam vaktsına aldy

ÓSKEMEN. QazAqparat – Óskemen qalasynda 170 myńnan astam adam koronavırýsqa qarsy vaktsına saldyrdy, dep habarlaıdy QazAqparat tilshisi.

Qala ákimdiginiń málimetinshe, kún saıyn COVID-19 ınfektsııasyna qarsy ekpe alǵandar sany artyp keledi. Qazirgi ýaqytta shahar turǵyndary úshin «Spýtnık V», «Vero Cell» jáne otandyq «QazVac» vaktsınalary qoljetimdi. Sońǵy málimetterge sáıkes, qala boıynsha 170 393 adam vaktsına saldyrǵan.

«Azamattar arasynda ekpe alǵandar sanyn arttyrý úshin birqatar shara uıymdastyrylýda. Onyń ishinde túrli jeńildikter men utys oıyndary da bar. Vaktsınany medıtsınalyq mekemelerde, keıbir saýda ortalyqtarynda jáne jyljymaly ekpe pýnktterinde alýǵa bolady», - delingen aqparatta.

Esterińizge sala ketsek, osyǵan deıin Óskemende vaktsına alǵandar arasynda baǵaly syılyqtar oınatylatyndyǵy jaıly habarlaǵan bolatynbyz.