Óskemen túrmesinde qarsylyq kórsetken sottalǵandardy toqtatý úshin oq atýǵa týra keldi

ÓSKEMEN. QazAqparat – Óskemen qalasynda túrmege laqtyrylǵan tyıym salynǵan zatty almaq bolǵan sottalǵandar saqshylarǵa qarsylyq kórsetti. Mekeme qyzmetkerleri aýaǵa birneshe ret oq atýǵa májbúr boldy, dep habarlaıdy QazAqparat tilshisi.

QR Ulttyq ulany «Shyǵys» óńirlik qolbasshylyǵy baspasóz qyzmetiniń málimetine súıensek, oqıǵa 14 sáýirge qaraǵan túni saǵat 00.21-shamasynda Óskemendegi №16 túzetý mekemesiniń beketteriniń birinde bolǵan.

«Belgisiz bireý qorshaýdyń arǵy jaǵynan túrme aýmaǵyna tyıym salynǵan zattardy laqtyryp jibergen. Oralǵan zat baqylaý kúzetindegi tyıym salynǵan aımaqqa tústi. Sol sátte 3 sottalǵan adam júgirip kelip, zatty alyp ketpek bolǵanda oqıǵa ornyna 6699 áskerı bóliminiń eki baqylaýshysy jedel jetip, sottalǵandardy ustaı bastady. Alaıda olar baqylaýshylarǵa qarsylyq kórsetken. Jaǵdaı ýshyǵyp bara jatqanyn joǵaryda baıqap turǵan saqshy dereý «Toqta, artqa shegin, atamyn!» dep aıǵaılap, avtomatty saqtandyrǵyshtan alyp, joǵaryǵa eskertý oǵyn atty», - deıdi baspasóz qyzmetiniń bastyǵy Baǵdat Amangeldi.

Osy kezde baqylaýshylardyń biri oralǵan zatty tyıym salynǵan aımaqtan negizgi qorshaý jaqqa qaraı laqtyryp jibergen.

«Sol kezde sottalǵandardyń biri ony alý úshin negizgi qorshaý aımaǵyna qaraı umtylǵan. Muny syrttan baqylap turǵan saqshy aıǵaılap, aspanǵa eskertý oǵyn atady. Qarýdyń dybysynan qoryqqan sottalýshy dereý artqa shegingen. Osy sátte ishki aýmaqqa júgirgen eki birdeı sottalǵan da dereý ustaldy», - deıdi B.Amangeldi.