Óskemen turǵyny ShQO ákimin sotqa berdi
Qala turǵyny zańger Nurlan Áýbákirov ShQO ákimi Ermek Kósherbaevty ózin qabyldamaǵany úshin sotqa berdi. Ol «ákim «Memlekettik qyzmet týraly» zań normalaryn buzdy» dep aryz jazǵan. Alǵashqy sot otyrysy 13 qańtar kúni ótedi. Osyǵan qatysty ShQO ákiminiń baspasóz hatshysy Tomırıs Kabaeva túsinik berdi.
- Azamat N.Áýbákirovtiń 2024 jyldyń 4 jeltoqsanynda oblys ákiminiń qabyldaýyna jazylý jónindegi ótinishi Shyǵys Qazaqstan oblysy ákimi apparatynyń ótinishterdi qaraýdy baqylaý bólimine 29 qarashada kelip tústi. Qabyldaýdan bas tartylǵan joq. 4 jeltoqsanda oblys ákiminiń qabyldaýynda bolatyn azamattardyń tizimi qalyptastyrylyp qoıǵanyna baılanysty jáne kelesi qabyldaý kestege sáıkes 2025 jyldyń 15 qańtaryna josparlanǵandyqtan, 20 jáne 27 jeltoqsan kúnderi oblys ákiminiń birinshi orynbasary jáne kóterilgen másele tikeleı quzyretine kiretin orynbasarynyń jeke qabyldaýyna shaqyryldy, - dedi ol.
Onyń aıtýynsha, N.Áýbákirov ol qabyldaýlardan bas tartqan.
- Reglament boıynsha jeke tulǵalar men zańdy tulǵalardyń ókilderin oblys ákimi jáne onyń orynbasarlary qabyldaıdy. Bul rette árbir azamat memlekettik organdardyń áreketine shaǵymdanýǵa quqyly, - dedi Tomırıs Kabaeva.
Eske salsaq, osyǵan deıin ShQO ekologııa departamentiniń burynǵy basshysyna qatysty sot úkimi shyqqany habarlanǵan.