Óskemen men Semeıde demalys kúnderi qoǵamdyq kólik júrmeıdi

ÓSKEMEN. QazAqparat - Óskemen men Semeı qalalarynda demalys kúnderi qoǵamdyq kólik qatynamaıdy, dep habarlaıdy QazAqparat tilshisi.

ShQO ákimi Danıal Ahmetovtiń aıtýynsha, bul - koronavırýs ınfektsııasynyń tez taralyp ketpeýin jáne oblysty «qyzyl» aımaqtan shyǵarý úshin amalsyzdan jasalyp otyrǵan shara.

Koronavırýs ınfektsııasyn juqtyrǵandardyń 41%-y Semeıde, 34%-y Óskemende tirkelgen.

Rıdder, Glýbokoe jáne Ulan aýdandarynda vırýs juqtyrǵandardyń sany ósip barady.

Osyǵan baılanysty sanıtarlyq-epıdemıologııalyq talaptardyń saqtalýyn baqylaýdy kúsheıtý úshin demalys kúnderi qoǵamdyq kólik qozǵalysyn shekteý týraly sheshim qabyldandy.

- Barlyq tamaqtaný oryndarynyń jumysy qatań baqylaýda bolady. Bızneske jasalǵan jeńildikter sanıtarlyq-epıdemıologııalyq normalardy saqtamaý degendi bildirmeıdi. Sondyqtan, kásipkerler de óz nysandaryn qadaǵalaýlary kerek», - dedi D.Ahmetov.

Sondaı-aq ol vaktsınatsııa qarqyny boıynsha oblys jaqsy nátıje kórsetip otyrǵanyn aıtty.

Vaktsınanyń eki komponentin 325 myńnan astam adam alǵan.