Óskemen men Semeıde 10 SOS dabyl túımesi ornatyldy
ShQO Polıtsııa departamenti baspasóz qyzmetiniń málimetine súıensek, «Halyq únine qulaq asatyn memleket» tujyrymdamasyn iske asyrý sheńberinde óńir boıynsha SOS dabyl túımeleri ornatylǵan. Jalpy Óskemen men Semeı shaharlarynda osyndaı 10 batyrma iske qosyldy.
«SOS dabyl túımesi quqyqqa qarsy áreketti baıqaǵan kezde nemese tótenshe jaǵdaılarda dabyl sıgnalyn berýge jáne polıtsııany shuǵyl shaqyrtýǵa arnalǵan. Olar adam kóp júretin qoǵamdyq oryndarda ornatyldy. Batyrmany basqan kezde ShQO PD jedel basqarý ortalyǵynyń operatorymen avtomatty túrde qosylý júrgiziledi. Osylaısha, beıne jáne aýdıo arqyly onlaın-rejımde ótinish berýshimen baılanysqa shyǵýǵa jáne oqıǵa týraly aqparatty tirkeýge múmkindik jasalǵan», - delingen aqparatta.
Dabyl túımesi Óskemen qalasynda kelesi mekenjaılar boıynsha ornalasqan:
- Qabanbaı batyr kóshesi («Zańǵar», «Anýar», «Evrazııa» saýda úıleriniń mańy),
- Temirjolshylar kóshesi («Óskemen-1» temirjol vokzalynyń mańy),
- Abaı dańǵyly («Zarechnyı» bazarynyń, «Temirlan», «Danıel» saýda úıleriniń mańy),
- Vınogradov-Grýzınskaıa kósheleri («Ivýshka» saýda úıiniń, «Dos-Nar» bazarynyń mańy),
- Nazarbaev dańǵyly (ShQO Dostyq úıiniń mańy).
Al Semeıde sondaı-aq myna mekenjaılar boıynsha osyndaı 5 batyrma jumys isteıdi:
- Zasıadko-Ýálıhanov kóshesi («Arkada», «Alıaska», «Aqshyn» saýda úıleriniń mańy),
- Ertistiń eski jaǵalaýy (stýdentter úıi, «Aıkel» meıramhanasynyń mańy),
- Áýezov dańǵyly («Okean», «Jańa bazar» saýda úıleriniń, «Álem» kınoteatrynyń mańy),
- Pýshkın kóshesi (Abaı alańy, «Staraıa melnıtsa», «Vdalı ot jen» dámhanalarynyń mańy),
- Muhamedhanov kóshesi («TsÝM», «Rahat», «Sýlpak», «Tehnodom» saýda úıleriniń mańy).