Óskemen men Semeı arasynda keme qatynaýy múmkin

SEMEI. QazAqparat – Semeı qalasynda keme qatynasy qaıta jandanýy múmkin, dep habarlaıdy QazAqparat tilshisi.

Abaı oblysynyń ákimi Nurlan Ýranhaev burynǵy ózen portyn aralap kórdi. Óńir basshysy munda keme qatynasyn jandandyrý qajettigin atap ótti.

«Ertistegi keme qatynasyn jandandyrý kerektigi týraly osyǵan deıin de aıtqan bolatynmyn. Kez-kelgen keme úshin pırs qajet ekendigi belgili. Sol úshin burynǵy ózen vokzalynyń jaǵdaıymen jiti tanystyq», - dedi Nurlan Uranhaev.

Oblys ákimi qalada keme qatynasyn jańǵyrtý úshin barlyq múmkindiktiń bar ekendigin aıtty.

«Qarjy jumyldyrýǵa daıyn ınvestorlar bar. Buryn Óskemen men Omby arasynda Semeı arqyly bizdiń maqtanyshymyz – «Raketalar» júretin. Keme qatynasyn qaıta jandandyrǵanymyz durys. Qazir halyqtyń kópshiligin jolmen júrý sharshatty. Óskemennen Semeıge jetý úshin shlıýzdeýdi esepke alǵanda úsh jarym saǵattaı ýaqyt ketedi. Kóbisi minedi dep oılaımyn. Júk tasymaldaryna keletin bolsaq - bul jeke taqyryp, ony esepten alyp tastamaımyz. Oǵan basqa ınvestorlar qajet bolady», - dep túıindedi N.Uranhaev.