Óskemen halqy óz tańdaýyn jasap jatyr – fotoreportaj

ÓSKEMEN. QazAqparat – Búgin Qazaqstanda respýblıkalyq referendým bastaldy. Halyq Konstıtýtsııaǵa 56 ózgeristiń engizilýine qatysty óz tańdaýyn jasap jatyr. Shyǵys Qazaqstan oblysynda 1027 referendým ýchaskesi bar. Al kásiporyndar men medıtsınalyq mekemelerde 68 daýys berý orny ashyldy. Osy rette, QazAqparat tilshisi Óskemendegi ýchaskelerdiń birine baryp, referendýmnyń qalaı ótip jatqanyn kórip qaıtty.

Zańbuzýshylyq tirkelgen joq

Jalpy Óskemen qalasynda 120 daýys berý ýchaskesi jumys istep tur. Onyń 110-ynda baıqaýshy bar. Aýa raıynyń qolaısyzdyǵyna qaramastan jurt óz ýchaskelerine baryp, óz tańdaýyn jasap jatyr.

Oqýshylar shyǵarmashylyq saraıynda ornalasqan №40 ýchaskege bas suqtyq. Bul ýchaskede Qabanbaı batyr, Anton Chehov, Protozanov, Qazaqstan, Saǵadat Nurmaǵambetov kóshelerinde turatyn 2599 adam tirkelgen. 9 adam múshe bolyp otyrǵan ýchaskelik komıssııanyń tóraıymy – bilim ordasynyń dırektory Galına Astashkına.

Onyń aıtýynsha, referendým tańerteń Ánurannan bastalǵan. Tańǵy jetide kelgender sany kóp bolǵanymen, qazir birshama azaıyp qaldy. Sebebi dalada jańbyr quıyp tur. Alǵash ret daýys bergenderge syılyq berilip jatyr.

Ýchaskede 2 baıqaýshy bar. Sonyń biri – «Amanat» partııasynyń ókili Marına Akmýrzınova.

«Referendým ýchaskesi ýaqytyly ashyldy. Kelip daýys beremin degen azamattarǵa tıisti jaǵdaı jasalǵan. Barlyǵynyń zań aıasynda ótýin qadaǵalap otyrmyz. Eshqandaı zańbuzýshylyq tirkelgen joq», - deıdi ol.

ShQO «Jastardyń aqparattyq-taldaý agenttigi» qoǵamdyq birlestiginiń atynan baıqaýshy bolyp otyrǵan Tatıana Harına halyqtyń kóńil-kúıi kóterińki ekenigin baıqady. «Tańerteń tańǵy 6-dan osyndamyz. Saılaý bıýlletenderin komıssııa múshelerine taratqan soń referendým barysyn baqylap otyrmyz. Tártip buzǵan eshkim bolmady. Daýys berip jatqan azamattardan patrıottyq rýh baıqalady. Olar elimizdiń bolashaǵyna beı-jaı qaramaı, azamattyq pozıtsııalaryn bildirýde», - deıdi T.Harına.

Óskemendikter óz tańdaýlaryn jasaýda

Referendýmǵa kelgenderdiń birin áńgimege tartyp kórdik. Shahar turǵyny Aıbol Áýezhanuly óz tańdaýyn jasady.

«Qabanbaı batyr kóshesinde turamyn. Referendým bolatynynan burynnan habardarmyz. Qandaı ózgerister engiziletinin oqyp, tanysyp shyqtym. Týǵan-týys, dos-jaran arasynda daýys berip jatqandar kóp», - deıdi ol.

Al Valerıı Agarkov uzaq jyldar boıy Úlbi metallýrgııalyq zaýytynda ter tókken. Qazir zeınette. Ol da búgin kelip, óz daýysyn berdi.

«Konstıtýtsııaǵa 56 ózgeris engizý josparlanyp otyr. Buqaralyq aqparat quraldarynan naqty qandaı jańashyldyqtar bolatynyn oqydym. Balalarymnyń, nemerelerimniń bolashaǵy úshin óz tańdaýymdy jasadym», - deıdi V. Agarkov.