OSK úgit-nasıhat talaptaryn buzǵan 4 kandıdatty jaýapqa tartýǵa ruqsat berdi
«Prokýratýra organdary osy saılaý zańnamasynyń múltiksiz saqtalýyna kúndelikti monıtorıng jasap otyr. Úgit-nasıhattyń zań talaptaryna qaıshy júrgizilýine baılanysty 5 fakt anyqtaldy, ıaǵnı olar kandıdattardy tirkeý aıaqtalmas buryn sharalaryn bastap ketken. Onyń ishinde 1 kandıdat ákimshilik jaýapkershilkke tartyldy. Al, tórteýi tıisti tirkeýden ótip qoıǵan. Zań talaptaryna sáıkes, kandıdattyń tirkelgen kúnnen bastap saılaý qorytyndysy jarııalanǵanǵa deıin sot sheshimimen ákimshilik jaýapkershilikke tartylýy tek Ortalyq saılaý komıssııasynyń kelisimimen ǵana júzege asyrylady. Bas prokýratýra osyndaı zań talaptaryn buzý faktilerin sheshý barysynda jáne Ortalyq saılaý komıssııasynyń ruqsatyn alý maqsatynda keshe tıisti usynysty OSK tóraǵasynyń atyna joldady. Bizdiń usynysymyzdy qarap, 4 kandıdatty jaýapkershilikke tartýǵa ruqsat berýińizdi suraımyz», - dedi Bas prokýrordyń orynbasary Jandos Ómirálıev.
Onyń aıtýynsha, tirkeý aıaqtalmaı jatyp, úgit-nasıhat jumystaryn bastap ketkender – Astana, Taraz jáne Qaraǵandydaǵy bir mandatty saılaý okrýgterinen shyqqan kandıdattar.
«Bas prokýratýra joldaǵan usynymdardyń mazmuny uqsas bolǵandyqtan, osy 4 azamatqa qatysty sheshimdi bir qaýlymen qabyldaýdy usynamyn», - dedi OSK múshesi Asylbek Smaǵulov.
Ortalyq saılaý komıssııasynyń músheleri tirkelgen 4 úmitkerdi jaýapqa tartý sheshimine biraýyzdan qoldaý bildirip, kelisim berdi.
Buǵan deıin habarlaǵanymyzdaı, saılaý aldyndaǵy úgitti júrgizýdiń belgilengen tártibi men sharttaryn saqtamaýmen ushtasqan birqatar zań buzýshylyqtar tirkeldi.