OSK tóraǵasy otstavkaǵa ketýi múmkin be

ASTANA. QazAqparat – Ortalyq saılaý komıssııasynyń tóraǵasy Nurlan Ábdirov BAQ ókilderiniń saılaýdaǵy olqylyqtar týraly saýalyna jaýap berdi, dep habarlaıdy QazAqparat tilshisi.

OSK-da ótken baspasóz maslıhatynda BAQ ókilderi Nurlan Ábdirovten saılaý júıesindegi olqylyqtardy joıý múmkin bolmasa, otstavkaǵa ketýi múmkin be ekenin surady.

«Men osy qyzmetke byltyr 25 qańtarda keldim. Odan keıin biz 5 maýsymda referendým ótkizdik. Sonda referendýmnyń aıasynda bizge birneshe myń shaǵym tústi. Birsypyra dúnıe istelip jatyr. Myna jerde otyrǵan áriptesterimmen birge bar kúsh-jigerimizdi salyp, taza, aq nıetimizben osy jumysqa kiristik. Biz ári qaraı olqylyqtardy joıýǵa bar kúshimizdi salamyz. Biz jabylyp alyp, jumysty kórpeniń astynda istep jatqanymyz joq.

Birinshiden, bul qyzmetti men surap alǵan joqpyn. Men ómirde qyzmet suraǵan emespin. Maǵan jumysty júktedi, qoldan kelgenshe adal isteýge tyrysyp jatyrmyn. Óz erkimmen bul qyzmetti tastaýǵa eshqandaı negiz joq, arym taza», - dep jaýap qaıtardy Nurlan Ábdirov tilshi saýalyna oraı.

Eske salaıyq, búgin OSK Májilis saılaýynyń túpkilikti qorytyndysyn jarııalady. Oǵan saı, Parlamenttiń tómengi palatasyna 6 partııa ótti.