OSK: Saılaýda foto, aýdıo nemese vıdeojazbaǵa tyıym salynbaıdy, biraq bári zańǵa saı bolýy kerek

NUR-SULTAN. QazAqparat – Ortalyq saılaý komıssııasynyń qaýlysy foto, aýdıo jáne beınejazbany júrgizýge tyıym salmaıdy. Alaıda olardyń bári de daýys berý qupııasyn jáne saılaýshylardyń derbes derekteriniń qorǵalýyn eskere otyryp júrgizilýi tıis ekenin eskertedi. Ortalyq saılaý komıssııasynyń múshesi Serik Sydyqov osylaı dedi, dep habarlaıdy QazAqparat tilshisi.

«Foto, aýdıo, beınetúsirilim baqylaýshyǵa saılaý protsesiniń barysyn obektıvti baǵalaýǵa, azamattyq, qylmystyq ister jáne ákimshilik quqyq buzýshylyq týraly ister boıynsha dáleldemeler retinde paıdalaný úshin yqtımal zań buzýshylyqtardy tirkeýge múmkindik beredi. Eger olar zańnamada kózdelgen talaptardy saqtaı otyryp júrgizilse – ruqsat. Bul rette baıqaýshylar buzýshylyqtar týraly óz tujyrymdaryn naqty jáne tekseriletin dáleldemelerge negizdelýi tıis ekenin eskergen jón», - dedi búgingi OSK otyrysynda Serik Sydyqov.

Osylaısha, túsirilgen foto, beıne, shyǵarylǵan aýdıojazbalar is-áreketterge arnaıy baǵa berýde ýákiletti organdardyń dáleli retinde paıdaǵa jaraýy tıis. Eger baıqaýshy foto, aýdıo, beınetúsirilimdi jarııalaǵysy kelse, onda baıqaýshy QR Azamattyq kodeksiniń (145 bap) talaptaryn saqtaýy tıis.