OSK Meıram Qajykendi Prezıdenttikke kandıdat retinde tirkedi

ASTANA. QazAqparat – Ortalyq saılaý komıssııasy úmitker Meıram Qajykendi QR Prezıdenti saılaýyna kandıdat retinde resmı tirkedi, dep habarlaıdy QazAqparat tilshisi.

Búgin Ortalyq saılaý komıssııasynyń kezekti otyrysynda 20 qarashada ótetin QR Prezıdenti saılaýyna úmitker Meıram Qajykenniń kandıdatýrasynyń zań talaptaryna saı keletini jáne ony kandıdat retinde tirkeý máselesi qaraldy.

«Aýmaqtyq saılaý komıssııalarynyń hattamalaryna sáıkes QR Prezıdenttigine kandıdat Meıram Qajykendi qoldaý maqsatynda elimizdiń 14 óńirinde 122 184 azamattyń qoly jınaldy. Onyń barlyǵy tekserildi, sonyń ishinde kandıdatty qoldaǵan 120 055 qol senimdi dep tanyldy», - dedi ortalyq saılaý komıssııasynyń múshesi Shavkat Ótemisov.

Sondaı-aq, úmitkerdiń qujattardy ýaqytyly tapsyrǵany jáne olardyń talapqa saı keletini aıtyldy.

«Qurmetti jıynǵa qatysýshylar, osylaısha ortalyq saılaý komıssııasy Qajyken Meıram Zekeshulyn QR Prezıdentine kandıdat retinde tirkedi», - dedi Ortalyq saılaý komıssııasynyń tóraǵasy Nurlan Ábdirov.

Odan bólek, jıyn sońynda OSK tóraǵasy Meıram Qajykenge kandıdat kýáligin tabys etti.

Eske salsaq, 4 qazanda Ortalyq saılaý komıssııasyna Prezıdent saılaýyna kandıdat retinde usynylǵan Meıram Qajykenniń qujattary tapsyryldy.

Al 8 qazan kúni úmitker memlekettik tildi meńgerý deńgeıi boıynsha emtıhan tapsyryp, odan sátti ótti.

Aıta keteıik, Meıram Qajyken kandıdat retinde «Amanat» Qazaqstan kásipodaqtar dostastyǵy» respýblıkalyq birlestigi atynan usynylyp, tirkeldi.