OSK majorıtarly júıe boıynsha eń kóp kandıdat tirkelgen okrýgterdi atady

ASTANA. QazAqparat – Ortalyq saılaý komıssıasy tóraǵasynyń orynbasary Konstantın Petrov majorıtarly júıe boıynsha eń kóp kandıdat tirkelgen okrýgterdi atady, dep habarlaıdy QazAqparat tilshisi.

Ortalyq saılaý komıssııasynyń kezekti otyrysynda bir mandattyq okrýgter boıynsha saılanatyn QR Parlamenti Májilisiniń jáne máslıhattardyń depýtattyǵyna kandıdattardy tirkeý qorytyndylary talyqylandy.

«Keshe keshki jaǵdaı boıynsha tirkeý qorytyndylary mynandaı. Barlyǵy 29 birmandatty majorıtarlyq saılaý okrýgteri boıynsha saılaý komıssııalary 475 kandıdatty tirkedi. Bul orta eseppen bir mandatqa 15 kandıdattan degen sóz. Eń joǵary báseke Astana qalasynyń №1 jáne №2 okrýgterinde boldy, sáıkesinshe 41 jáne 42 kandıdat tirkeldi. Almaty qalasynyń №3, №4 jáne №5 saılaý korýgterinde sáıkesinshe 37, 33 jáne 34 kandıdat tirkeldi. Eń tómen báseke - Túrkistan oblysynyń №25 saılaý okrýginde 5 kandıdat tirkeldi», - dedi Konstantın Petrov.

Eske salsaq, keshe Májilis pen máslıhat saılaýynyń úgit-nasıhat kezeńi bastaldy.

Sondaı-aq, keshe Ortalyq saılaý komıssııasy partııalardyń ataýlary saılaý bıýleteninde qandaı tártippen ornalasatynyn jerebe arqyly anyqtaǵan bolatyn.

Jerebe qorytyndysyna saı, 19 naýryzǵa taǵaıyndalǵan partııalyq tizimder boıynsha Parlament Májilisi men máslıhattarǵa kezekten tys saılaýda daýys berýdi ótkizý kezeńinde saıası partııalardyń ataýlary saılaý bıýleteninde kelesi tártippen ornalasady: Amanat partııasy - birinshi orynda, «Aýyl» halyqtyq-demokratııalyq partııasy - ekinshi orynda, «Respublica» partııasy – úshinshi orynda, Qazaqstan halyq partııasy – tórtinshi orynda, «Baıtaq» jasyldar partııasy – besinshi orynda, «Aq jol» partııasy – altynshy orynda, Jalpyulttyq sotsıal-demokratııalyq partııasy – jetinshi orynda.