OSK qoǵamdyq birlestik ókilderiniń referendýmǵa qatysý tártibin túsindirdi

NUR-SULTAN. QazAqparat - Elordada Ortalyq referendým komıssııasynyń otyrysynda QR Ortalyq saılaý komıssııasy tóraǵasynyń orynbasary Konstantın Petrov qoǵamdyq birlestik ókilderiniń referendýmǵa qatysý tártibin túsindirdi, dep habarlaıdy QazAqparat tilshisi.

OSK málimetine qaraǵanda, 2022 jylǵy 5 maýsymda daýys berý jergilikti ýaqyt boıynsha tańǵy saǵat jetiden bastap keshki saǵat jıyrmaǵa deıin ótkiziledi. Ýchaskelik referendým komıssııasy daýys berý ýaqyty men orny týraly azamattardy daýys berý ótetin kúnnen on kún buryn, ıaǵnı 2022 jylǵy 25 mamyrǵa deıin buqaralyq aqparat quraldary jáne ózge de tásildermen habardar etedi.

Konstantın Petrovtyń aıtýynsha, daýys berý kúni ýchaske ashylǵan kezden bastap referendým ýchaskesinde daýystardy sanaý nátıjeleri anyqtalǵanǵa deıin respýblıkanyń qoǵamdyq birlestikteriniń ókilderi, shet memleketter men halyqaralyq uıymdardyń baıqaýshylary qatysýǵa quqyly.

«Buqaralyq aqparat quraldary referendýmǵa ázirlik pen ony ótkizý barysyn jarııa etedi, olardyń referendým komıssııalary janynda akkredıttelgen ókilderiniń referendým ótkizýge baılanysty is-sharalarǵa qatysýyna kepildik beriledi.

«Respýblıkalyq referendým ótkizý kezinde Qazaqstan Respýblıkasynyń qoǵamdyq birlestikteri ókilderiniń, shet memleketter men halyqaralyq uıymdardan baıqaýshylardyń ókilettikterin kýálandyrý qaǵıdalaryn bekitý týraly» Ortalyq referendým komıssııasy qaýlysynyń jobasy belgilengen tártippen ashyq normatıvtik quqyqtyq aktilerdiń ınternet-portalynda ornalastyrylǵan», - dedi OSK tóraǵasynyń orynbasary.

Erejede respýblıkalyq referendým ótkizý kezinde daýys berý úshin ýchaskege ókilderdi jiberetin qoǵamdyq birlestik Qazaqstan Respýblıkasynyń zańdy tulǵalardy memlekettik tirkeý salasyndaǵy zańnamasynda belgilengen tártippen elimizde tirkelýi tıis dep kózdelgen.

«Respýblıkalyq referendým ótkizý kezinde qoǵamdyq birlestiktiń ókili Qazaqstan Respýblıkasynyń azamaty ǵana bola alady. Qoǵamdyq birlestik ókiliniń ókilettigi onyń tegi, aty, ákesiniń aty kórsetile otyryp, jazbasha nysanda rastalady. Bul qujat ókildi jibergen qoǵamdyq birlestiktiń mórimen rastalady», - dedi K. Petrov.

Budan buryn habarlanǵandaı, Qazaqstanda 10 013 referendým ýchaskesi iske qosylady.

Ortalyq referendým komıssııasy bıýlletenderdi daıyndaýǵa qatysty qaýly qabyldady.