OSK: Halyqaralyq uıymdardyń eki baıqaýshysyn akkredıtteý keri qaıtaryldy

ASTANA. QazAqparat – 20 qarashada ótetin kezekten tys QR Prezıdenti saılaýyna Shanhaı yntymaqtastyq uıymy jáne Islam yntymaqtastyǵy uıymy atynan usynylǵan eki baıqaýshyny akkredıtteý keri qaıtaryp alyndy. Bul týraly Ortalyq saılaý komıssııasynyń hatshysy Muhtar Erman málimdedi, dep habarlaıdy QazAqparat tilshisi.

QR Ortalyq saılaý komıssııasynyń kezekti otyrysynda halyqaralyq uıymdardyń baıqaýshylaryn 20 qarashadaǵy kezekten tys QR Prezıdenti saılaýyna akkredıtteýdi keri qaıtaryp alý máselesi qaraldy.

«10 qarashada Shanhaı yntymaqtastyq uıymynyń ókili Shaý Chen akkredıtteýden ótti. Biraq ol saılaýǵa halyqaralyq baqylaýshy retinde qatysa almaıdy. Osyǵan baılanysty delegatsııa quramyna tıisti ózgeris engizý qajet. Budan basqa, 14 qarashada QR Ortalyq saılaý komıssııasyna QR Syrtqy ister mınıstrliginiń usynysy kelip tústi. Oǵan sáıkes 2022 jylǵy 20 qarashaǵa taǵaıyndalǵan kezekten tys prezıdent saılaýyna akkredıttelgen Islam yntymaqtastyǵy uıymy delegatsııasynyń quramyna tıisti ózgeris engizý qajet. Usynys dıplomatııalyq arna arqyly alyndy. Baıandalǵan málimetti eskere otyryp, ortalyq saılaý komıssııasy qaýlysynyń jobasy daıyndaldy. Osy oraıda Shanhaı yntymaqtastyq uıymynan Shaý Chen jáne Islam yntymaqtastyǵy uıymy atynan Shakır Mahmýdty halyqaralyq baıqaýshy retinde akkredıtteýdi toqtatyp, kýálikterin keri qaıtaryp alý qajettiligi týyndaıdy», - dedi Muhtar Erman Ortalyq saılaý komıssııasynyń otyrysynda.

Ortalyq saılaý komıssııasynyń músheleri atalǵan qaýlyny bir aýyzdan qoldady. Osylaısha, OSK halyqaralyq uıymdardyń eki baıqaýshysyn akkredıtteýdi alyp tastady.