OSK elektoraldy kezeńde komıssııa músheleriniń jalaqysyn kóterýdi usyndy

ASTANA. QazAqparat - Astanada Ádilet mınıstri Marat Beketaevtyń basshylyǵymen zań jobalaý qyzmeti máseleleri jónindegi vedomstvoaralyq komıssııanyń kezekti otyrysy ótip jatyr. Jıynda QR Ortalyq saılaý komıssııasy tóraǵasynyń orynbasary Vladımır Foss «Qazaqstan Respýblıkasynyń saılaý týraly» QR Konstıtýtsııalyq zańyna ózgerister men tolyqtyrýlar engizýdi usyndy, dep habarlaıdy «QazAqparat» HAA tilshisi.

«Saılaý týraly zańdy ózgertý máselesi sońǵy ret 2007 jyly qaralǵan. Biz eki zańǵa ózgeris engizýdi usynamyz», - dedi Vladımır Foss.

Tóraǵanyń orynbasary elektoraldy kezeńde tek saıası partııalardyń ókilderiniń saılaý komıssııasynyń múshesi bolýyn toqtatýdy, komıssııa músheleriniń jumysyn jeńildetý úshin ýchaskelik saılaý komıssııasynyń sanyn kóbeıtýdi, qoǵamdyq jumys bolǵandyqtan elektoraldy kezeńde komıssııa músheleriniń aılyǵyn kóterýdi, komıssııa quramynda bir uıymnyń jartysy bolmaýy kerektigin eskerýdi, saılaýdan soń, máslıhat otyrysynan keıin komıssııanyń birinshi otyrysyn kim shaqyratynyn anyqtaýdy usyndy.

Sondaı-aq, ol komıssııa quramynda keıbir saıası partııalardyń ókilderi bolmaı qalǵan jaǵdaıda múshelerdiń quziretin keńestik daýyspen anyqtaýdy, halyqaralyq baıqaýshylardyń pikir akkredıtatsııasyn jınaqtaýdy, zańda bolmaǵandyqtan, okrýgter men ýchaskelerdiń aýmaqtaryn anyqtaýdy surady.

«Buǵan qosa úgit baǵytynda ózgerister men tolyqtyrýlardy engizýdi, OSK ótkizetin debattardan basqa da debattardy uıymdastyrýdy, ınternet-resýrstarmen jumys júrgizýdi júıeleýdi, úgit jumystary áskerı bólimderde qalaı júrip jatqanyn anyqtaýdy, saılaý bıýlleteniniń jetkizilýin anyqtaýdy, aımaqtarda máslıhat saılaýyn jergilikti bıýdjettiń kómegimen ótkizý máseleleriniń qamtylýyn usynamyz», - deıdi ol.

Sondaı-aq, Vladımır Karlovıch elektoraldy kezeńde nelikten komıssııa músheleriniń aılyǵyn kóterý máselesin tilge tıek etip otyrǵanyn jetkizdi.

«Komıssııa bes jylǵa saılanady. Eki aılyq elektoraldy kezeńde olar respýblıkalyq qarjylandyrýdyń arqasynda jumys atqarady. Bári zańǵa sáıkes. Komıssııa músheleri atqarǵan jumystary úshin alatyn qarjylary az bolǵandyqtan komıssııa quramynda jumys atqarýdan bas tartyp jatyr. Óıtkeni, eń tómengi aılyq deńgeıiniń úsh eselengen somasy olardy qanaǵattandyrmaıdy. Sol sebepti, eń tómengi aılyq deńgeıin olara 4 eselep tóleýdi usynamyz», - dedi Vladımır Karlovıch.