OSK: Baqyt Jańabaevtyń kandıdatýrasy talapqa saı

ASTANA. QazAqparat – Ortalyq saılaý komıssııasy QR Prezıdenttigine kandıdat Baqyt Jańabaevtyń barlyq talapqa sáıkestigi týraly qaýly qabyldady, dep habarlaıdy QazAqparat tilshisi.

Aıta keteıik, onyń kandıdatýrasyn 3 qazanda «Qazaqstan áýesqoı fýtbolshylarynyń» qoǵamdyq birlestigi usynǵan. Al 11 qazanda Baqyt Jańabaev úmitkerlerdi tirkeýdiń sońǵy sátinde qujattaryn tapsyrǵan bolatyn.

Ortalyq saılaý komıssııasynyń múshesi Sabıla Mustafınanyń dereginshe, úmitker «Qazaqstan áýesqoı fýtbolshylarynyń» qoǵamdyq birlestigi otyrysynyń prezıdenttikke usyný týraly hattamasynan úzindi, ómirbaıan derekteri, Ortalyq saılaý komıssııasynyń shotyna saılaý jarnasynyń engizilgenin kýálandyratyn qujat, jeke basyn kýálandyratyn qujattyń kóshirmesi jáne joǵary bilimi týraly dıplomynyń kóshirmesin tapsyrǵan.

Usynylǵan qujattardy rastaý maqsatynda Ortalyq saılaý komıssııasy Іshki ister mınıstrligine, QR Bas Prokýratýrasynyń quqyqtyq statıstıka jáne arnaıy esepke alý jónindegi komıtetine, QR Memlekettik qyzmet isteri agenttigine jáne QR Ádilet mınıstrligine tıisti suraýlar jiberilgen.

Onyń nátıjelerin baıandaǵan Sabıla Mustafına úmitkerdiń «QR saılaý týraly» Konstıtýtsııalyq Zańynyń 54 jáne 56-baptaryna saı qoıylatyn talaptarǵa tolyq sáıkes keletinin málimdedi.

Tıisinshe, Ortalyq saılaý komıssııasy Baqyt Jańabaevtyń kandıdatýrasy barlyq talapqa sáıkes ekenin rastaıtyn qaýly qabyldady.

Eske salaıyq, QR Prezıdenttigine kandıdat Baqyt Jańabaev búgin memlekettik tilden emtıhan tapsyrǵan bolatyn.

Lıngvıstıkalyq komıssııanyń málimetinshe, atalǵan úmitker memlekettik tildi erkin meńgergen.