Orystildiler kóshedegi qazaqsha sózderdiń janyna orysshalap aýdarýdyń reti joq ekenin alǵa tartýda - D. Kóshim
Bul joba aıasynda elimizdiń soltústik óńirlerinde orystildi azamattarǵa memlekettik tildi nasıhattaý sharalary qamtyldy. Osy oraıda birqatar aýdandarda jergilikti turǵyndardyń, belgili qoǵam qaıratkerleriniń, tilderdi damytý basqarmalary ókilderiniń qatysýymen pikir almasýlar uıymdastyryldy. Jobanyń barlyq sharalaryna belgili qoǵam qaıratkeri D. Kóshim jetekshilik etti. «Osy talqylaýlar kezinde shyndyǵynda men kútpegen tamasha usynystardy estidim. Máselen, ózge ult ókili pikir almasýlar kezinde «nege UBT tapsyrǵan kezde qazaq tilinen alǵan ball oqýǵa túsken kezde eseptelmeıdi?» degen saýal qoıdy. Onyń aıtýynsha, balasy qazaq tilin jaqsy meńgergen jáne testileý kezinde joǵary ball jınaǵan eken»,-deıdi saıasattanýshy. D. Kóshimniń sózine qaraǵanda, shara aıasyndaǵy jıyndar kezinde orystildi azamattar kóshedegi jazýlardy tek qazaq tilinde ǵana jazý týraly usynystar jasaǵan. «Elimizdiń soltústik óńirlerdi aralaǵan kezde orys ultynyń ókili «nelikten dúkenderde «nan» degen sózdiń janyna orysshalap «hleb» degen aýdarmasyn jazyp qoıasyńdar» degen renishin aıtty. Bul turǵyda ol kóptegen jyldar boıy Qazaqstanda turǵandyqtan, bundaı qarapaıym sózderdi kez kelgen ózge ult ókilderi biletindigin alǵa tartyp otyr. Sonymen qatar olar kóshe ataýlary jazylǵan taqtashalar máselesin kóterdi. Mysaly,kóshedegi taqtashada «Muhtar Áýezov» ataýy jazylyp tursa, onyń astynda orysshalap jazylǵan nusqasy beriledi. Osy oraıda orystildiler «biz osynsha aqymaq emespiz, Muhtar Áýezovtiń kim ekenin bilemiz» degen ýájderin aıtyp jatty»,-dedi saıasattanýshy.