Orynborda karýsel qulap, 20 adam zardap shekti

ORYNBOR. TASS-QazAqparat – Orynbordaǵy demalys saıabaǵynda karýsel qulap, balalar zardap shekti, dep habarlaıdy QazAqparat TASS agenttigine silteme jasap.

«Oqys oqıǵa týraly habarlama tústi. 20 shaqty adam zardap shekken, arasynda kámelet jasqa tolmaǵan balalar bar», - delingen aımaqtyq ІІB málimetinde.

Zardap shekkender medıtsına qyzmetkerlerine tapsyrylǵan.

«Medıtsınalyq kómek tolyq kólemde kórsetilip jatyr. Federaldy ortalyqtar mamandarymen telemedıtsınalyq keńester júrgizildi. Zardap shekkenderge kómek kórsetý barysyn Reseı densaýlyq saqtaý mınıstrligi katastrofalar medıtsınasynyń federaldy ortalyǵy úılestirip otyr», - dedi mınıstrlikten.

Aımaqtyń densaýlyq saqtaý mınıstri Tatıana Savınovanyń aıtýynsha, 12 adam aýrýhanaǵa jatqyzylǵan.

«Zardap shekken 20 adamnyń 12-si aýrýhanaǵa jatqyzyldy, 8 adam jaraqatynyń jeńildigine baılanysty ambýlatorııalyq em qabyldaıdy», - deıdi ol óziniń telegram kanalynda jarııalanǵan vıdeoda.

Aýrýhanaǵa jatqyzylǵandardyń jartysy, ıaǵnı altaýy – bala.

«Bir naýqastyń – 27 jastaǵy qyzdyń jaǵdaıy asa aýyr. Ol tolyǵymen qaraldy, qazir jansaqtaý bóliminde», - dep túsindirdi Tatıana Savınova.

Onyń aıtýynsha, jáne bir 10 jasar bala aýyr halde jatyr. Oǵan ota jasalmaq. Sondaı-aq, 10 adam ortasha-aýyr jaǵdaıda.