Orynbor qazaqtary Naýryzdy qazaq mádenıetiniń ulttyq aýylynda toılamaq
Mundaǵy qazaqtar qaýymdastyǵy «Jańa Aıqap» gazetin shyǵaryp, belsendi jumys jasaıdy. Onda tipti qazaq mádenıetiniń úı-murajaıy bar. Al Nejınsk lıtseıi men birqatar basqa oqý oryndarynda qazaq tili oqytylady. «Orynborda Naýryz Reseıdegi tuńǵysh "Ulttyq aýyl" aýmaǵynda ótedi. Ony jergilikti turǵyndar "Olımpıada aýyly" dep ataıdy. Aýyl shekaralas oblys basshylaryn qarsy alý úshin 2007 jyly salynǵan bolatyn. Birinshi bolyp bashqurt, qazaq jáne orys úı-jaılary salyndy, keıinirek basqalary: armıan, belarýs, mordova, nemis, tatar, ýkraın jáne chývash halyqtarynyń úıleri paıda boldy. Árbir aýlada etnıkalyq meıramhana men murajaı bar. Munda kóbinese sheteldik qonaqtar, ekskýrsııaǵa stýdentter men oqýshylar keledi», - dep jazady basylym. Qazaq mádenıetiniń Orynbordaǵy murajaı-úıi shyn mánisinde statsıonarlyq kıiz úıge uqsaıdy. Ekskýrsııa júrgizýshisi Janar Ispaeva kelýshilerge kıiz úıdiń qurylysyn aıtyp, qazaq etnografııasyn tanytatyn buıymdardy, Qazaqstan prezıdenti Nursultan Nazarbaev pen Reseı prezıdenti bolǵan Dmıtrıı Medvedevtiń Orynbordaǵy kezdesýde shaı ishken keselerin kórsetedi.