Orynbasarynyń jemqorlyǵy úshin Ekibastuzdyń ákimi otstavkaǵa ketti

EKІBASTUZ. QazAqparat - Pavlodar oblysynyń ákimi Ekibastuz qalasy ákiminiń otstavkasyn qabyldady, dep habarlaıdy QazAqparat.

«Memlekettik qyzmet týraly» Zańǵa sáıkes Ekibastuz qalasynyń ákimi baǵynyshty qyzmetkeriniń sybaılas jemqorlyq quqyq buzýshylyǵy úshin otstavkaǵa ótinish berdi.

Pavlodar oblysy ákimdigi baspasóz qyzmetiniń málimetinshe, ol 8 tamyzdan bastap atqaryp otyrǵan laýazymynan bosatylǵan.

Ekibastuz qalasynyń ákimi Ardaq Qańtarbaev otstavka týraly ótinishin óziniń tikeleı baǵynysyndaǵy qyzmetker - qala ákiminiń orynbasary Baýyrjan Ahmetovke qatysty sot úkimi kúshine engen soń berdi.

Pavlodar oblysynyń ákimi Ábilqaıyr Sqaqov otstavkany qabyldap, Ekibastuz qalasynyń ákimi Ardaq Qańtarbaevty laýazymynan bosatty.

Ardaq Qańtarbaev Ekibastuz qalasy ákiminiń laýazymynda 2020 jyldyń qyrkúıek aıynan bastap jumys istegen edi.

Eske sala keteıik, Ekibastuz qalasy ákiminiń orynbasary para alǵany úshin sottalǵan.

Maýsym aıynda Ekibastuz qalalyq soty Ekibastuz ákiminiń orynbasary Baýyrjan Ahmetovke jáne onyń qaramaǵyndaǵy TKSh bólimi basshysynyń orynbasary A.Sadyqov pen sol bólimniń bas mamany K.Túsipbekovke qatysty úkim shyǵardy.