Órttiń kesirinen úsh balasy men úıinen aıyrylǵan qostanaılyq otbasy baspanaly boldy

NUR-SULTAN. QazAqparat – Qaıǵy jutqan otbasyna jańa úı «Qazaqstan halqyna» qorynyń qarajaty esebinen alyndy. Oǵan jergilikti ákimdik ókilderi kómek suraı júgingen, dep habarlaıdy QazAqparat Qordyń baspasóz qyzmetine silteme jasap.

Ótinishti operatorlar jedel qarastyryp, Qordyń Qamqorshylyq keńesi men Basqarmasy kómek kórsetý týraly sheshim qabyldaıdy. Muqtaj otbasyna baspana alý úshin 10 mln teńge bóledi. Jańa úıdiń qora-qopsysy bar, jıhazben jabdyqtalǵan.

«Qazir otbasy osy úıge kóshti, biraq bul olardyń qaıǵysyn jeńildetpeıtini túsinikti. Degenmen, qaıǵy jutqan ata-ana jalǵyz balasymen týystarynyń úıin panalap júrýge májbúr edi», - deıdi Amangeldi aýylynyń ákimi Gaýhar Jandildına.

Belgili bolǵanyndaı, «Dıplommen aýylǵa» baǵdarlamasy aıasynda Amangeldi aýylyna baryp, jumys istep júrgen erli-zaıyptylar órtenip ketken úıdi nesıege alǵan. Jergilikti ákimdiktiń kómegimen jas otbasy nesıeniń qalǵan bóligin japty.

«Qazaqstan halqyna» qory baspasóz qyzmetiniń habarlaýynsha, turǵyn úı satyp alýǵa qaıyrymdylyq kómek kórsetý týraly sheshim tosynnan bolǵan qaıǵyly oqıǵaǵa baılanysty bir rettik erekshe jaǵdaı retinde tirkelip otyr.

Eske sala keteıik, 31 naýryzda Amangeldi aýylyndaǵy jeke turǵyn úıden órt shyǵyp, 2016, 2019 jáne 2020 jyly týǵan úsh bala kóz jumǵan edi.