«Órtti sóndirýge ketip, iz-túzsiz joǵaldy»: Abaı oblysynda traktorshyny izdestirý jalǵasýda

SEMEI. QazAqparat – Abaı oblysynda Semeı ormanyndaǵy órtti sóndirýge ketip, qaıta oralmady delingen er adam áli tabylmaı jatyr, dep habarlaıdy QazAqparat tilshisi.

Sergeı Arhıpov oblys aýmaǵyndaǵy órtti sóndirýge kómektesý úshin traktorymen shyǵyp ketip, iz-túzsiz ketkeni týraly aqparat taraǵan bolatyn. Ol sońǵy ret baılanysqa 9 maýsym kúni shyqqan.

Oblystyq Polıtsııa departamenti S.N.Arhıpovtyń joǵalǵanyn rastap, onyń ornalasqan jerine qatysty qandaı da bir aqparat bolsa, onda «102» nómirine nemese jaqyn mańdaǵy polıtsııa bólimshesine habarlasýdy suraǵan edi.

Búgin áleýmettik jelide 1987 jyly týǵan turǵynnyń denesi tabylǵany jaıly aqparat tarady.

«Bul aqparat shyndyqqa sáıkes kelmeıdi. Er adamdy izdestirý is-sharalary áli jalǵasyp jatyr», - dep málim etti Polıtsııa departamentiniń baspasóz qyzmetinen agenttik tilshisine.

Aıta keteıik, búgin ótken Úkimet otyrysynda Abaı oblysynyń ákimi Nurlan Uranhaev S.N.Arıpovty izdeý jumystary jalǵasyp jatqanyn baıandaǵan bolatyn. Ol minip ketken traktor keshe, Dmıtrıevka aýylynan 5 shaqyrym qashyqtyqtan, dalaly jerde tabylǵan edi.