Órtten zardap shekkenderge azyq-túlik emes, qurylys materıaldary men turmystyq tehnıka qajet - turǵyn

QOSTANAI. QazAqparat – Qazaqstannyń ár aımaǵynan Qostanaı oblysyna gýmanıtarlyq kómek joldanyp jatyr. Búgingi tańda óńirge azyq-túlik, kıim jáne jeke gıgıena quraldary sııaqty 500 tonnadan astam kómek jetkizilgen. Endi zardap shekkenderge arnap salynatyn úıler úshin qurylys materıaldary men turmystyq tehnıka qajet. Bul týraly Áýlıekól aýdandyq máslıhatynyń hatshysy Dáýlet Qoıshybaı málimdedi, dep habarlaıdy QazAqparat tilshisi.

«Búgingi tańda 500 tonnadan astam ónim ákelindi. Olar - un, kúnbaǵys maıy, makaron, sý, konserviler, jeke gıgıena quraldary, jyly kıim sııaqty zattar. Qostanaıǵa gýmanıtarlyq kómek tıelgen 302 kólik keldi. Ol zardap shekkenderdiń qajettilikterin tolyq jabýǵa jetkilikti», - dep atap ótti Áýlıekól aýdany máslıhatynyń hatshysy Dáýlet Qoıshybaı.

Ol oblys halqynyń atynan qıyn sátte qol ushyn sozǵan barsha qazaqstandyqtarǵa alǵysyn jetkizdi.

«Biz gýmanıtarlyq kómekti azyq-túlik kúıinde jiberýdi toqtata turýdy suraımyz. Qazir órtten zardap shekkenderge arnap salynatyn jańa úılerdiń qurylysyn bastaımyz. Endi qurylys materıaldary men turmystyq tehnıkaǵa úlken qajettilik týyp otyr», - dedi Dáýlet Qoıshybaı.

Bul rette Pavlodar oblysynyń turǵyndary jedel áreket etip, azyq-túlik ornyna Qostanaıǵa qurylys materıaldary bar eki júk kóligin jibergen.

Eske salaıyq, buǵan deıin Aqmola oblysynan 50, al Almaty oblysy 105 tonnadan astam azyq-túlik jiberilgen bolatyn.

Sonymen qatar, Ulttyq ekonomıka mınıstri Álibek Qýantyrov órtten zardap shekken Qostanaı oblysynyń turǵyndaryna rezervten qarajat bólinetinin málimdegen edi.