Órtten zardap shekken qostanaılyqtarǵa kómek kórsetý úshin arnaıy shot ashyldy

QOSTANAI. QazAqparat – Qostanaıda órtten zardap shekken otbasylar sany búgin 15-ke jetti. Jergilikti turǵyndar men mekemeler olarǵa kómek qolyn sozýǵa nıetti. Osy maqsatta arnaıy shot ashyldy, dep habarlaıdy QazAqparat tilshisi.

Qostanaı qalasynyń ákimi Marat Júndibaevtyń aıtýynsha, shahar turǵyndary men jergilikti mekemeler kómekterin usynyp jatyr. Osyǵan baılanysty «Súıikti Qostanaı» qoǵamdyq qory arnaıy shot ashyp, onyń rekvızıtteri BAQ pen áleýmettik jelilerde jarııalandy.

«Órtten búlingen múliktiń qunyn anyqtaý boıynsha quramyna táýelsiz sarapshylar tartylǵan jedel komıssııa jumys istep jatyr. Komıssııanyń qorytyndysy negizinde shyǵyndy óteý somasy naqtylanady. Qala ákimdiginiń tıisti bólimderi jyljymaıtyn múliktiń quqyqtyq negizde rastaýshy qujattaryn qalpyna keltirýge kiristi. Qazir bul qyzmet 6 otbasyna qajet. Máseleni jedel sheshý úshin TJ basqarmasy barlyq qajetti anyqtamalardy usynyp otyr», - dedi ákim.

Buǵan deıin Qostanaıda 13 otbasy órtten zardap shekkeni habarlanǵan. Bul jaıt qala kólemindegi tótenshe jaǵdaı bolyp esepteledi. Alǵashqy kómek retinde ár otbasyna 200 myń teńgeden berildi. Sondaı-aq, qalalyq eńbekpen qamtý jáne áleýmettik baǵdarlamalar bóliminen zardap shekken otbasylardyń árqaısysyna 70 AEK kóleminde bir rettik járdemaqy bólinedi.