Órtten zardap shekken qostanaılyqtar ótemaqy tańdasa jańa úıler salyna ma

QOSTANAI. QazAqparat – Órtten zardap shekkender úı emes, ótemaqy alýdy qalasa, onda olardyń baspanasy turǵyn úı kezeginde turǵan azamattarǵa beriledi. Óńirlik kommýnıkatsııalar qyzmetinde ótken brıfıngide Qostanaı oblystyq sáýlet jáne qala qurylysy basqarmasynyń basshysy Berik Tańjaryqov osylaı málim etti, dep habarlaıdy QazAqparat tilshisi.

«Buǵan deıin aıtqanymyzdaı, Áýlıekól aýdanynda 91 úı salynady. Degenmen keıbir azamattar jańa úıdi emes, ótemaqyny tańdaýy múmkin. Biraq buǵan baılanysty salynatyn úıler sanyn qysqartpaımyz. ıAǵnı, 91 baspana salyna beredi. Órtten zardap shekkender úı emes, ótemaqy alamyz dese, onda olardyń baspanalary turǵyn úı kezeginde turǵan azamattarǵa beriledi», - dedi basqarma basshysy.

Budan bólek Berik Tańjaryqov alapat órtten zardap shekkender jańa úılerdiń qurylysy aıaqtalǵanǵa deıin qaıda turatynyn aıtty. Onyń sózinshe, ýaqytsha evakýtsııalanǵan adamdar Áýlıekól aýdanyndaǵy jataqhanalarǵa ornalastyrylady.

Úıi órtengen qostanaılyqtarǵa 500 myń teńgeden alǵashqy kómek beriletini de málim etildi. Mundaı somadaǵy qarajat 91 otbasyǵa usynylady.

Sondaı-aq oblysta bolǵan alapat órtten bolǵan mal men qus shyǵyny anyqtaldy.