Órtten qorǵanýdy tolyq qamtý úshin qosymsha 177 depo qajet - QR TJM

ASTANA. QazAqparat - Іri qalalar men 5 myń turǵyny bar eldi mekenderdi órtke qarsy tolyq deńgeıde qorǵaý úshin kem degende qosymsha 177 órtke qarsy deponyń qurylysy qajet. Bul týraly búgin Astanada Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda QR Tótenshe jaǵdaı mınıstri Vladımır Bojko málim etti.

«Osy kórsetkishke qol jetkizý úshin, aldaǵy 10 jylda 15-ten kem emes depony jyl saıyn salý kerek bolady»,-dedi mınıstr. Onyń sózine qaraǵanda, 2014 jylǵa arnalǵan bıýdjet aıasynda TJM úshin alty avtokólikke arnalǵan úsh órtke qarsy deponyń qurylysyn aıaqtaýǵa qarjy bólindi. Sonymen qatar Astana, Atyraý, Aqtaý, Pavlodar, Aral qalalarynda órtke qarsy depolardyń bes tıptik jobasyn bekitý boıynsha, sondaı-aq eki depony EKSPO-2017-ge daıyndyq aıasynda jobalaý-smetalyq qujatnamany ázirleýge qoldaý jasaldy. Buǵan qosa taǵy 10 órtke qarsy bólimder ǵımarattaryna tolyq jóndeý jasaýǵa qarjy qarastyryldy. Bul maqsattarǵa bıyl respýblıkalyq bıýdjetten 3,32 mlrd. teńge bólindi. Belgili bolǵandaı, búginde Qazaqstanda 166 órt depolary 40 jyldan astam ýaqyttan beri paıdalanylyp keledi. Osy oraıda qazirgi kezde 21 deponyń ǵımaraty apattyq jaǵdaıda tur.