Órtten 3 adamdy qutqaryp ózi kóz jumǵan Asqar Zabıkýlınge «Altyn adam» syılyǵy berildi

ASTANA. QazAqparat – «Altyn Adam – Jyl adamy» uıymdastyrý komıteti Astanadaǵy órtten birneshe adamdy qutqaryp, keıin ózi aýrýhanada kóz jumǵan Asqar Zakıbýlındi «Altyn adam» dep tanydy. Bul týraly batyrdyń jary áleýmettik jelidegi paraqshasynda jazdy, dep habarlaıdy QazAqparat tilshisi.

«Biz qazir eńbek demalysynda júretin edik. Almatynyń Arbatynda qol ustasyp, kofe iship, qydyryp júrýshi edik. Solaı josparlaǵan edik qoı.

Sol kúni, 16 qarashada seni kezekshilikke shyǵaryp salyp turyp, oıymda eshteńe joq aıta salǵan edim. «Alaqaı, 20-sy kúni seniń sońǵy kezekshiligiń eken, ári qaraı demalystamyz» deppin. Al sen aıttyń: «Janym, sońǵy emes, demalys aldyndaǵy kezekshilik» dediń. Endi mine, 20 qarashada sen eńbek demalysyna shyqtyń. Máńgilik, uzaq, bitpeıtin, qaıtyp kelmeıtin demalystasyń... Al men bul dúnıedemin. Bizdiń josparymyzdaǵydaı emes. «Altyn Adam» taǵaıyndaǵan seniń «Jyo qaharmany» atalymyndaǵy madaqtamańdy áketýge keldim», - deıdi Anel Zakıbýlına.

Onyń aıtýynsha, búgin ekeýiniń otaý qurǵandaryna 5 jyl tolǵan.

«Ómir shynymen qıyn, qatygez, aıaýshylyqty bilmeıtin, tipti keıde boljap bolmaıtyn dúnıe.

Ol eshkimdi aıamaıdy. Meıli jasyń 10-da nemese 40-ta bolsyn. Soǵan qaramastan sen jarqyn ári abyroıly ómir súrdiń. Altyn adamsyń sen, Asqar Zabıkýlın! Ǵasyr adam, Ǵasyr qaharmany. Ómirden ótkennen keıin», - dep jazdy batyrdyń jubaıy.

Eske sala keteıik, elordada kópqabatty úıde órt bolyp, 3 adam, onyń ishinde bir bala aýrýhanaǵa tústi. Al, 3 adamdy qutqarǵan órt sóndirýshi Asqar Zabıkýlındi 80% kúıik shalyp, jansaqtaý bólimine jatqyzyldy. Oǵan dostary kómek jınady.

Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.