Ortsaılaýkom aldaǵy saılaýǵa daıyndyq jumystaryn tyńǵylyqty júrgizýde - E.Sloboda

ASTANA. QazAqparat - QR Ortalyq saılaý komıssııasy aldaǵy saılaýǵa daıyndyq jumystaryn tyńǵylyqty júrgizýde. Bul týraly búgin QR Ortalyq saılaý komıssııasynda brıfıng bergen TMD baıqaýshylary mıssııasynyń jetekshisi Evgenıı Sloboda aıtty.

«Ortalyq saılaý komıssııasy aldaǵy saılaý naýqanyna daıyndyq jumystaryn turaqty ári ret-retimen júrgizip jatqanyn atap ótkim keledi. Ádistemelik qamtamasyz etý de tyńǵylyqty júrgizilip, kadrlar da jaqsy jasaqtalǵan», - dedi ol.

Mıssııa basshysy ózderi bolǵan barlyq saılaý komıssııasynda barlyq jumystardyń joǵary deńgeıinde uıymdastyrylǵanyna kýá bolǵandyqtaryn basa atap ótti.

«Munan bólek, Ortalyq saılaý komıssııasy saılaý protsesin uıymdastyrýshylarǵa, BAQ ókilderine, saıası partııalarǵa arnaıy oqytý semınarlaryn ótkizdi. Atalǵan semınarlarda OSK músheleri, quqyq qorǵaý organdarynyń, onyń ishinde prokýratýranyń, sottardyń ókilderi sóz sóılep, saılaý zańnamasyn qoldaný joldaryn jan-jaqty túsindirip berdi», - dep atap ótti E.Sloboda.