Órtengen páterde qalǵan balany qutqarǵan semeılik marapattaldy

SEMEI. QazAqparat – Semeı qalasynda órtengen páterde qalyp qoıǵan 5 jasar balany qutqarǵan er adam marapattaldy, dep habarlaıdy QazAqparat tilshisi.

Qalalyq Tótenshe jaǵdaılar basqarmasy baspasóz qyzmetiniń málimetine súıensek, Svıatoslav Bıketov órtenip jatqan kórshi páterden 5 jasar balany qutqaryp qalǵany úshin marapattaldy.

«Qazaqstan Respýblıkasy Tótenshe jaǵdaılar mınıstrliginiń buıryǵymen beıbit kúnniń batyryna Alǵys hat tabystaldy. Semeı qalalyq TJB bastyǵy Talǵat Dúısebaev oǵan jyly lebizin bildirip, batyldyǵy úshin alǵys aıtty», - delingen aqparatta.

Esterińizge sala ketsek, oqıǵa 16 qyrkúıekte 408 kvartal kóshesinde bolǵan. Sol jerge órt sóndirýshiler kelip jetkenshe kórshi Svıatoslav Bıketov esikti ashyp, balany syrtqa alyp shyqty. Sodan keıin ol jalpy aýdany 3 sharshy metrdi quraǵan qyzyl jalyndy óz betimen aýyzdyqtaǵan.