«Ortalyqazııalyq yntymaqtastyq syrtqy saıasattaǵy basty baǵyttardyń biri bolýy kerek» - BAQ-qa sholý

ASTANA. 14 maýsym. QazAqparat - «QazAqparat» agenttigi respýblıkalyq basylymdarda 14 maýsym, juma kúni shyqqan ózekti materıaldarǵa sholýdy usynady.

***

Keshe keshqurym Qazaqstan Respýblıkasynyń Prezıdenti Nursultan Nazarbaev resmı saparmen Tashkent qalasyna keldi. Memleket basshysyn qalanyń halyqaralyq áýejaıynda Ózbekstan Respýblıkasynyń Prezıdenti Islam Karımov kútip aldy. Osy jaıt arqaý bolǵan maqala el gazeti «Egemen Qazaqstanda» «Kórshilestik kókjıegi keńeıip keledi» degen taqyryppen berilgen. «Nursultan Nazarbaevtyń kórshiles elge resmı saparynyń aıasynda Ózbekstan Prezıdenti I.Karımovpen kelissózder josparlanǵan. Memleket basshylary buryn qol jetkizilgen kelisimderdiń oryndalý barysy týraly jáne mem­le­ketaralyq túrli yntymaqtastyq baǵyty men ekijaqty qarym-qatynasty damytý máselesin talqylaıdy. Kelissózder ná­tıjesi boıynsha ekijaqty jáne úkimet­aralyq birqatar kelisimderge de qol qoıy­lady dep kútilýde», - dep jazady basylym.

Úkimet pen Ulttyq banktiń jańa zeınetaqy zańnamasyn Parlament qabyrǵasynda qorǵaýy kezinde qoǵamda da qyzý pikirtalastar týyp jatqan bolatyn. Biraq, soǵan qaramaı, zań jobasy eki palatadan da ótip, qol qoıýǵa jiberilgen-di. Artynan Prezıdent Nursultan Nazarbaev atalǵan zańdyq qujatqa baılanysty arnaıy Úndeý jarııalap, jaǵdaıǵa túsinik berdi. Osy rette «Egemen Qazaqstan» gazeti pikirin bilmek nıetpen Májilis depýtaty Omarhan Óksikbaevty áńgimege tartqan. Basylym tilshisiniń saýaldaryna tuşymdy jaýap bergen halyq qalaýlysy: Shynyn aıtqanda, zań jobasyn ózimiz qınala-qınala qoldap daýys berdik. Óıtkeni, kóptegen áıelderge munyń aýyr tıetinin túsindik. Esesine Elbasynyń zań­dy bekitpegen qadamyn áıel­derge jasaǵan keń­shiligi men raqym­shylyǵy dep bilemin. Úkimet te osy zań jobasyn Parlamentke erikkennen ákelgen joq qoı. Bul ózi o basta lajsyzdyqtan týyndaǵan zań jobasy bolatyn. Qazir búkil álemde osyndaı úderister júrip jatyr. Elbasy osynyń barlyǵyn jan-jaqty saralap, bıýdjettiń múmkindikterin tereń esepteı kelip, tek sodan keıin ǵana osyndaı sheshimge keldi. Prezıdent osylaısha taǵy da óziniń kóregendigin, halqyna degen janashyrlyǵyn kór­setip otyr», - dedi. Suhbat «Elimen birge ekenin kórsetti» degen taqyryppen berilgen.

***

Parlament Májilisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev «Aıqyn» gazetine bergen arnaıy suhbatynda aımaqtaǵy qaýipsizdikti saqtaý joldary, eldegi ekstremıstik uıymdarmen kúres máseleleri, ortalyqazııalyq ıntegratsııanyń baǵyttary men «Shal» fılmi tuńǵıyǵyndaǵy ıdeıa jaıynda keńinen tarqatyp aıtyp bergen. Suhbat «Ortalyqazııalyq yntymaqtastyq syrtqy saıasattaǵy basty baǵyttardyń biri bolýy kerek» degen taqyryppen berilgen. Basylym tilshisiniń barlyq saýalyna egjeı-tegjeıli jaýap bergen ol: «Keden odaǵy da, Biryńǵaı ekono­mıkalyq keńistik te, qurylýǵa josparlanǵan Eýrazııalyq ekonomıkalyq odaq ta qaýipsizdikti qamtamasyz etetin nemese saıası baǵyttaǵy uıym emes. Olar­dyń maqsaty - belgili bir memleketter arasynda ortaq ekonomıkalyq keńistikti qalyptastyryp, taýarlardyń, kapıtaldardyń, qyzmet kórsetýdiń, jumys kú­shi­niń erkin qozǵalysyn, aınalysyn qamtamasyz etý. Bul elimizdiń ekonomıkalyq áleýetin kúsheıtip, álemdik ekonomıkada básekelestikke qabiletin arttyrýǵa yqpal etpek. Elbasymyz atalǵan uıymdarda táýel­sizdigimizge nuqsan keltiretin máseleler júzege asyrylmaıtyndyǵyn ashyp aıtty. Saıası ıntegratsııa týraly áńgime joq. Bul jerde mán beretin bir másele mynada: bar­­lyǵy ózinen-ózi bola qalatyndaı nárse retinde qaramaı, osy uıymdardyń ishinde óz saıasatymyzdy júrgizip, kún tártibimizdegi máselelerdi dáleldep, olar­dy qabyldata bilýimiz shart»,- deıdi.

Sonymen qatar, basylym tilshisimen «Shal» fılmi jaıyndaǵy pikirimen bólisken halyq qalaýlysy: «Fılm seksen paıyzǵa kóńilimnen shyqty dep aıta alamyn. Júz paıyz deýden qorqý kerek. Sebebi shyǵarmashylyq adamyna ári qaraı da jetildirýge, oılanýǵa bir nárseler qalýy tıis. Onda adam taǵdyryna, rýhyna, qundylyqtarǵa baılanysty ıdeıalar aıtyldy. Biraq fılmniń bir-eki jerinde «ári qaraı da damytýǵa bolar edi» degen oı keldi. Bul - sońǵy joba emes, osy salada basqa oılarymdy da júzege asyratyn shyǵarmyn. Mundaı jobalar adamnyń shyǵarmashylyq áleýetin júzege asyrýǵa múmkindik beredi», - deıdi.

Qazaqstanda jańadan salynatyn barlyq ǵımarattar «tóbesi - Kúnnen, qabyrǵalary - jelden, al jertólesi - jerasty termaldy kózderinen qýat óndiretin» shaǵyn elektr stansalaryna aınalýǵa tıis. «Aıqyn» gazetiniń búgingi sanyndaǵy «Endi Kúnnen, jelden qýat alamyz» degen taqyryptaǵy maqalada Qaırat Mámıdiń tóraǵalyǵymen ótken Joǵarǵy palatanyń keshegi jalpy otyrysynda senatorlar Úkimetke osyndaı usynyspen shyqqandyǵy jaıly jazylǵan. Basylymnyń atap ótýinshe, «Qazaqstannyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zańyn Qorshaǵan ortany qorǵaý mınıstri N.Qapparov qorǵady. «Jańartylatyn energııa kózderinen (JEK-ten) qýat óndirýshilerdiń shyǵyndaryn óteý úshin bıýdjetten jyl saıyn 800 mıllıon teńge qajet bolady. Biraq bul jerde biz qurylǵynyń qunyn tek ol Qazaqstanda jasalǵan bolsa ǵana óteıtin bolamyz. Jáne de qýaty 5 kılovatqa deıingi qurylǵylardyń ǵana shyǵyny óteledi. ıAǵnı shalǵaı aýdandardaǵy shaǵyn úı sharýashylyqtaryna arnalǵandary ǵana», deıdi mınıstr.