Ortalyq jáne jergilikti atqarýshy organdar qandaı máselelerge nazar aýdarýǵa tıis

ASTANA. QazAqparat – 2022 jyly toǵyz óńirde 7 ekonomıkalyq kórsetkish boıynsha oń ósim boldy. Bul týraly búgin Úkimet otyrysynda QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«7 ekonomıkalyq kórsetkish boıynsha óńirler arasyndaǵy jalpy jaǵdaı mynadaı: búkil kórsetkishter boıynsha oń ósim 9 óńirde – Aqmola, Almaty, Batys Qazaqstan, Jetisý, Qostanaı, Qyzylorda, Pavlodar, Shyǵys Qazaqstan oblystarynda, sondaı-aq Shymkent qalasynda baıqaldy», - dedi ol.

Osy rette mınıstr ortalyq jáne jergilikti atqarýshy organdar nazar aýdarýy tıis is-sharalardy atady.

«Birinshi - otandyq azyq-túlik taýarlaryn óndirýshilerge qoldaý sharalaryn kórsetý jáne olarmen satý baǵasyn belgileý týraly kelissózder júrgizý. Ekinshi - ınvestorlarǵa keshendi qoldaý kórsete otyryp, ınvestıtsııa aǵynyn ulǵaıtý boıynsha tıimdi sharalardy iske asyrý. Úshinshi kóktemgi egiske tıisti daıyndyq jumystaryn júrgizýge keshendi qoldaý kórsetý, óńdeý ónerkásibinde josparlanǵan ósý qarqynyn qamtamasyz etý. Tórtinshi - eksporttaý baǵyttarynyń balamaly joldaryn qalyptastyrý arqyly otandyq ónimniń jańa naryqtarǵa shyǵýyna qoldaý kórsetý, shıkizattyq emes eksportty jan-jaqty qoldaý. Besinshi -bıznes ókilderin keshendi qoldaý jáne olar úshin qolaıly jaǵdaılardy qamtamasyz etý», - dedi Álibek Qýantyrov.