Ortalyq saılaý komıssııasynyń ókileti keńeıýi múmkin

NUR-SULTAN. QazAqparat – «Ashyq NQA» portalynda Konstıtýtsııalyq zańdarǵa ózgerister men túzetýler engizýdi kózdeıtin zańnyń jobasy talqylanyp jatyr. Atalǵan qujatta Saılaý týraly zańǵa engizý josparlanǵan ózgerister men túzetýlerdiń tizbesi berilgen, dep jazady QazAqparat tilshisi.

Qujattyq tolyq ataýy – «Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha Qazaqstan Respýblıkasynyń keıbir Konstıtýtsııalyq zańdaryna ózgerister men tolyqtyrýlar engizý týraly» Zań jobasy.

28 shildege deıin qoǵam talqysynda bolatyn qujattyń jobasyna súıensek, «Qazaqstan Respýblıkasyndaǵy saılaý týraly» Qazaqstan Respýblıkasynyń 1995 jylǵy 28 qyrkúıektegi № 2464 Konstıtýtsııalyq zańynyń ondaǵan babyna 100-gý jýyq ózgeris pen túzetý usynylǵan.

Sonyń ishinde Ortalyq saılaý komıssııasynyń ókileti men mindetine qatysty birqatar ózgertýler bar. Naqtyraq aıtsaq, saılaýǵa baqylaý júrgizetin qoǵamdyq birlestikter men kommertsııalyq emes uıymdardy akkredıtteý ókileti berilmek.

«16-10) jarǵylyq qyzmetine saılaýdy baıqaý jónindegi qyzmetti júzege asyrý jatatyn qoǵamdyq birlestikter men kommertsııalyq emes uıymdardy akkredıtteý tártibin ázirleıdi jáne bekitedi;

16-11) jarǵylyq qyzmetine saılaýdy baıqaý jónindegi qyzmetti júzege asyrý jatatyn respýblıkalyq qoǵamdyq birlestikter men kommertsııalyq emes uıymdardy akkredıtteýdi júzege asyrady;

16-12) saılaýdy, referendýmdy ázirleý men ótkizý kezeńinde saılaý komıssııalaryn uıymdastyrý men olardyń qyzmeti úshin qajetti taýarlardy, jumystar men kórsetiletin qyzmetterdi satyp alý qaǵıdalaryn jáne bekitedi;

16-13) aýmaqtyq saılaý komıssııalarynyń kandıdattaryna qoıylatyn biliktilik talaptaryn ázirleıdi jáne bekitedi», -dep jazylǵan usynylyp otyrǵan zańjobasynda. Qoldanystaǵy Saılaý týraly zańnyń 12-babynda mundaı norma joq.