Ortalyq saılaý komıssııasy Parlamenttiń jańadan saılanǵan eki depýtatyn tirkedi

NUR-SULTAN. QazAqparat - Ortalyq saılaý komıssııasy shyǵyp qalǵandardyń ornyna saılanǵan Parlament depýtattaryn tirkedi, dep habarlaıdy QazAqparat.

3 mamyrda Nurlan Ábdirovtiń tóraǵalyǵymen QR Ortalyq saılaý komıssııasynyń otyrysy ótip, eki qaýly qabyldandy.

Onyń bireýi - Parlament Senatynyń shyǵyp qalǵan depýtatynyń ornyna Almaty oblysynan saılanǵan depýtatty tirkeý týraly qaýly. Ortalyq saılaý komıssııasy Janbolat Ákebaıuly Jórgenbaevty QR Parlamenti Senatynyń depýtaty retinde tirkeýge qaýly etti.

Ekinshisi - Qazaqstan halqy Assambleıasynan shyǵyp qalǵan depýtattyń ornyna 28 sáýirde saılanǵan Parlament Májilisiniń depýtatyn tirkeý týraly qaýly. Onyń negizinde Ortalyq saılaý komıssııasy Qazaqstan halqy Assambleıasynan saılanǵan Zakırjan Pirmuhameduly Kýzıevti Parlament Májilisiniń depýtaty retinde tirkedi.

Sondaı-aq, osy kúni Ortalyq saılaý komıssııasynyń tóraǵasy Nurlan Ábdirov Parlament depýtattary Janbolat Jórgenbaev pen Zakırjan Kúzıevke kýálik pen omyraýǵa taǵatyn belgilerdi tabys etti.

Jıyn barysynda ol atalǵan halyq qalaýlylarynyń Almaty oblystyq máslıhatyndaǵy belsendi depýtattyq qyzmetin erekshe atap ótti.

Sóziniń sońynda Nurlan Ábdirov saılanǵan depýtattarǵa respýblıkanyń zań shyǵarý bıligin júzege asyratyn joǵary ókildi organynda tabys pen jemisti jumys tiledi.

Eske sala keteıik, biz buǵan deıin Janbolat Jórgenbaev pen Zakırjan Kýzıevtiń saılaýda basym daýys jınap, depýtat atanǵanyn jazǵan bolatynbyz.